Aralar, ENBA eta EHNEko abeltzainak ez dira igandean larreen irekiera «antzerkira» joango
Aralarko abeltzainek eta ENBA eta EHNE nekazaritza eta abeltzaintza elkarteek «antzerki» gisa definitu dute Enirio-Aralar Mankomunitateak igande honetarako antolatutako larreen irekiera ekitaldia. «Ezin da egun bakar batean zuritu urte osoan egin ez dena».
Aralarko abeltzainek eta ENBA eta EHNE nekazaritza eta abeltzaintza elkarteek iragarri dute igande honetan ez direla joango Aralarko larreen irekiera ekitaldira, eta «antzerki» gisa definitu dute, mendiko abeltzaintza «jaiegun batetik haratago urte osoa babestu behar delako».
Ohar batean azaldu dutenez, «ganadua mendira igotzen duten abeltzainek, bertan lan egin eta bizi direnek, ez dute ezer ospatzeko». Bere ustez, Enirio-Aralar Mankomunitateak, mendiaren gaineko eskumena duenak, «jai honekin urtean zehar egin ez duena ezkutatu nahi du eta, horrela, bere jarduerarik eza justifikatu, gizarte osoaren aurrean normaltasun itxura emanez».
Horren aurrean, abeltzainak ez daudela «antzerki honetan parte hartzeko prest» adierazi dute, ez baitute «Enirio-Aralar Mankomunitatearen utzikeriaren konplize» izan nahi.
Horregatik, ez dute ekitaldian parte hartuko eta ez dute ganadurik eramango. «Ezin da egun bakar batean zuritu urte osoan egin ez dena, eta, gainera, gu ez gaude horretarako prest», azpimarratu dute.
«Duintasuna»
Aurreko astean ere, mendiko artzaintzaren «duintasuna» aldarrikatu zuten ENBAk eta EHNEk eta Enirio-Aralar Mankomunitateak inguruko mendietan duen «utzikeria eta axolagabekeria» kritikatu.
Ildo horretan, nekazarien sindikatuek «mendian bizi eta lan egiten duten artzainentzako txaboletan egin beharreko inbertsioak, sasiak kentzea eta bide-azpiegiturak ezinbestekoak» direla defendatu zuten.