Jaka-Zabaleta / Irribarria-Albisu partidak irekiko du Masterseko playoff-a Zestoan ostiralean

Urrutikoetxea-Rezusta eta Altuna-Imazen arteko lehia, aldiz, Hondarribian jokatuko da igandean eta oraindik ikusteke dago amezketarra bertan jokatzeko moduan izango den, nahiz eta sentsazioak oso onak diren. 

Eskuzko pilota enpresa profesionalek jakitera eman dituzte asteburu honetan Masterseko play offak jokatuko diren data eta pilotalekuak eta Jokin Altunari osatzeko denbora gehiago eman nahian, Jaka-Zabaleta eta Irribarria-Albisu partidak emango die hasiera kanporaketei ostiral gauez Zestoako pilotalekuan jokatuko den partidarekin. Bi bikoteek ere itxura eskasa eman zuten ligaxkako azken jardunaldian eta euren jokorik onena berreskuratzen saiatuko beharko dute udako lehiaketarik garrantzitsueneko finalerdietan egon nahi badute.

Beste kanporaketa, ordea, Hondarribiko Jostaldi pilotalekuan jokatuko dute, igande arratsaldez, Urrutikoetxea-Rezusta eta Altuna III.a-Imaz bikoteek. Momentuz, Aspek Jokin Altuna iragarri badu ere, ikusteke dago amezketarra igandean jokatzeko moduan izango den. Eskuin izterreko zuntz hausturak hobera egin duen arren, aste amaiera aldera egingo du Aspeko aurrelariak jokatzeko moduan dagoen ikusteko azken proba bat eta horren arabera erabakiko du. ETBn pilotaria oso itxaropentsu irten da, baina binaka entrenamendu gogor bat egin nahi du azken erabakia hartu aurretik. Atzo Lekeition Danel Elezkanok primeran ordeztu zuen eta berme osoko aukerak ditu Eibarko enpresak bere izar nagusia ordezkatzeko.

Kontuan izan behar da, gainera, lehiaketa sistema bitxi honi esker, bi kanporaketetako galtzaileen artean tantorik gehien egiten dituen bikoteak ere aurrera egingo duela. Alde horretatik, igandean jokatuko duten bi bikoteek alde bat izan dezakete, aurrera egiteko zenbait tanto egin behar dituzten jakingo baitute kantxara irten aurretik.