Inoizko bisitari gehien bildu da Gernika-Lumon, berriz ere Urriko Azken Astelehena gozatzeko

Urriko Azken Astelehenak bere izaera berreskuratu du Gernika-Lumon, pandemiak behartutako bi urteko etenaldiaren ondotik, herritarrek gogotsu hartu dute. 125.000 herritar bildu dira, inoizko bisitari gehien 300 postuz betetako kaleetan. Artisauen produktuak eta gaztak izan dira nagusi salmahaietan.

Artekale, Domingo Alegria, Industria kalea, Juan Calzada, Pasealekua eta San Juan postuz beteta esnatu dira Gernika-Lumon. Urriko Azken Asteleheneko ospakizunak gaba beltzarenarekin bat egin du eta jende askok zubia izan du. Horri izurriteak eragindako bi urteko geldialdiaren ondoko gogo berezia gehitu behar zaio. Goizeko bederatzietan zabaldu dute azoka: 293 salmahai jarri dituzte, bereziki artisauen produktuz eta gaztaz ongi hornituak. 125.000 lagun elkartu dira Gernikako kaleetan, inoizko bisitari gehien izan ditu gaurkoan azokak.

Topaketa handi izateaz gain, baserritarren lana aitortzeko lekua ere bada eta sariak banatu dituzte eguerdian. Mutrikuko Beñat Egañaren Goienetxe gaztandegiko gazta, Garikoitz Llonaren milalore eztia eta Kortezubiko Javier Larrinagaren txilar eztia aukeratu dituzte produktu onenen artean. Bizkaia Berri nagusitu da fruten artean, Iurretako Ortuberri loreetan, Gamizeko Berezia bodega bere Uriarte zigiluarekin txakoli zurian, Butroi bodegako Sasine gorrian, eta Lezamako Magalarte beltzean. Agiñagako Larrebe gaztandegiak irabazi du bigarren saria eta Galarretako Azkarrak hirugarrena.

Onintza Enbeita, Andoni Egaña eta Sebastian Lizaso bertsolariek girotu dute plaza, eta jarraian gazta enkantea hasi da, lehiaketako irabazlearen eta bigarren onenaren gazta erdiekin. Mil Colorao Gernikako jatetxeak 6.100 euro ordaindu ditu Beñat Egañaren gaztaren truke. Diru hori Calzada jubilatuen etxearentzat izango da.

Itzultzeko ilusioa

«Bi urteren ostean jendea zutaz oroitu eta zure gaztaren bila etortzeak ilusio handia egiten du», aitortu dio Gorka Azurmendi Azkarra Arabako gaztandegiko langileak Efe agentziari. Gazta lehiaketako hirugarren saria eskuratu du, eta 2018an txapelduna izan zen.

«Beti ematen du poza Gernikara itzultzeak», adierazi du Xabier Larrinaga erlezainak. «Motibazio bat da zure produktuak erakutsi eta saltzea».

«Hamaika eta erdietan postuak topera zeuden. Ez ziren ikusi ere egiten», esan dio Ana gernikarrak Efe agentziari. Feria honetako produkturik arrakastatsuena, Gernikako babarruna, stand batzuetan kiloa 17 euroan saltzen zela erantsi du.

Ekoizleek agertu dutenez, duela hiru urtetik hona prezioak igo dituzte inflazioa eta euri falta direla eta.

Iñaki Gorroño alkateorde eta ferietako zinegotziak Radio Euskadiri azaldu dionez, aurten postu gutxiago izan dira normalean etortzen ziren baserritar batzuek ez etortzea erabaki dutelako, azken hilabeteetako euri eskasiaren ondorioz ez dutelako puntako produkturik lortu. «Hona etortzeko hoberena ekarri behar da», azpimarratu du Gorroñok. «Erakusleihoa dela esaten dugu, baina lehiaketa ere bada».

Bizkaibus, greban

Udal arduradunek azaldu dute jendetza espero zutela goizeko hamaiketatik aurrera, Bilbotik Gernikara arteko bidea egiten duten Bizkaibuseko autobusetako langileen 24 orduko greba gorabehera. Gidari guztiek egin dute greba.

Bizkaibusi zerbitzua ematen dioten hiru konpainiatako 150 langilek elkarretaratzea egin dute ordubetez Jose Antonio Agirre plazan, bidezko hitzarmen baten alde.

Oscar Lopez langileen ordezkariak Eferi azaldu dioenez, Bizkaibusi Bizkaian zerbitzua ematen dioten bost enpresatatik hiruk mobilizazioak hasi dituzte itun bat sinatzeko eskatzeko.

Eguna biribiltzeko, Gernika Jai Alai Winter Series txapelketa antolatu dute: Urko eta Manzi Alex eta Ibarluzearen aurka, eta Erkiaga eta Zabala Barandika eta Lekerikaren kontra.

Tapiak laguntzak iragarri ditu

Arantxa Tapia Lakuako Ekonomiaren Garapen, Jasangarritasun eta Ingurumeneko sailburua ere Gernika-Lumon izan da eta aldi baterako ezohiko laguntza batzuk iragarri ditu, 1.850.000 eurokoak, abeltegiko animalien elikadurara bideratutako enpresa operadoreentzat, lehengaien hornidura bermatzeko.

Egungo egoera «konplexua» dela-eta ekoizleek duten kezkarekin bat egin du Tapiak. Azken urtean ongarrien prezioak batez beste 2,24 biderkatu dira, pentsuen batez besteko prezioa %20 igo da, gasolioarena %83 eta elektrizitateak %74 egin du gora.