Euskara, gamerren eta rolarien plazatan pixkanaka bere tokia egiten

Euskara plaza berriak irabazten ari da. Teknologia berrien bidetik orain arte zapaldu gabeko lur-eremuetan pausoak ematen ari da. Makina bat euskal sortzaileren ahaleginaren fruitu da.

Landako Guneko areto nagusia Gamer Gela bihurtu da ostiral honetan. Ohiko solasaldietarako entzuleentzat prestatuta izaten diren aulkiak kendu eta mahaiek eta ordenagailuek hartu dute lekua. Euskarazko bideojokoak ezagutu eta ikusteko aukera dute, sortzaileen euren azalpenak entzuteko ere bai.

Gamer Erauntsia elkartea lan handia ari da egiten euskarazko bideojokoak garatzen. Lander Unzueta da kideetako bat. Pozik dago, «espero baino gazte gehiago» hurbildu zaizkielako.

«Euskarak bideojokoan esparruan duen presentzia urria da, zoritxarrez». Hala baieztatu du. Hutsune hau izan zen, hain zuzen ere, 2014an lanean hasi eta handik bi urtera elkartea abian jartzera bultzatu zituena.

Azken bi urteotan dezenteko igoera izan du. Euskarazko bideojokoen katalogoa sortu dute, 110 inguru. «Hilero hainbeste joku kaleratzen da... zati txikitxoa gara», onartu du. Irla ozeanoaren erdian.

Euskal garatzaileek ondutako jokoen berri ematen du batetik elkarteak bere webgunean, eta hautatutako produktuak euskarara ekartzen dituzte bestetik. «Gustukoa duguna hartu, euskarara ekarri daitekeen ikusi eta lanean hasten gara. Itzultzaile taldea daukagu horretarako. Gertatu zaigu garatzaile batek esan izana euskaratzeko denborarik ez zuela eta guk geuk egitea», kontatu du.

Kide bakoitzak nor bere denbora eta ahalegina jartzen du. Euskararen presentzia areagotzeko zer behar den galdetuta garbi dio: «Erakundeen babesa oso garrantzitsua da. Euskal Herrian bideojokoen industria potentea dago eta babesa eman behar zaio. Babestu behar da garatzailea eta baita jokoak euskaraz egotea».

«Zineman, esaterako, ohituta gaude euskarazko edukiak edukitzen baina gamer asko ez da konturatzen euskaraz jolasteko aukera dagoela eta gehiago egon daitezen guk geuk egin behar dugula lana edo aldarrikatu», jarraitu du.

Euskal Herrian eremu digitalean formakuntza alorrean ari dira lanean hainbat zentro. «Bilbon hiru ikastetxe daude, Digi Pen, Tartanga eta Harrobiak, hiruek eskaintzen dituzte bideojokoei lotutako ikasketak. Nafarroan Crea Navarra ere badago eta gero eta estudio gehiago daude bideojokoaren munduari lotuta», azaldu du.

Rol jokoak

Rolariak kolektiboko kideek ere parte hartu dute gaurko saioan. «Azokak eman digun aukera oso garrantzitsua, gure berri izan dezaten», aitortu du Ibai Peña kideak.

Elkartea sortu berria dute, nahiz aspalditik ari diren lanean. «Euskarazko rol jokoak garatzen ditugu, mordoxka bat ditugu merkatuan eta entitatea hartzen ari gara», esan du Peñak. Azokaren Sormen Beka eskuratu zuen ‘Atopia’ izan zen euskaraz ondutako lehena, ‘Adur’ bigarrena. Bidean dira gehiago.

Ez dute euren jarduera profesionala, nork bere aisia eskaintzen dio rol jokoak sortzeari. Ezezaguna da oraindik mundu hau gurean. Eta horrek ezezagutza dakar berarekin. «Uste oker asko daude. Aspaldiko prentsa txarrak ere ez du laguntzen», dio. Oso mundu aberatsa da irudimena lantzeko, zure ezaugarriak garatzeko, lotsa galtzeko... oso positiboa da alde guztietatik», dio.  

Rol jokoan talde bat elkartu eta saioaren zuzendariak gidatzen du partida baina jokalari denen artean sortzen dute gertakizuna. «Zineman ala literaturan aurrez idatzita dago gidoia baina rol partida guztiz irekia da. Dadoek edo txanponek erabakitzen dute nondik norakoa askotan», azaldu du.

Euskararen hautuaz galdetuta, hauxe erantzun du: «Gure rol jokoak euskaraz dira, ez dugu beste modu batean izaterik ulertzen».

Sortzaileen testigantza

Ekitaldian hiru euskal sortzaileren testigantza entzuteko aukera izan dute gazteek. Ibai Aizpurua –‘Barraka’ bideo jokoaren garatzailea, iaz irabazi zuen Azokaren Sormen Beka–, Eneko Zubiaurre ‘One Last Breathe’ren sortzailea– eta Eider Eibar ‘Kokoak’ jokoaren sortzailea izan dira bertan.

Plastilinaz egindako pertsonaiak ditu protagonista ‘Barraka’k. ‘One Last Breath’ proiektua duela bi urte sortutakoa da. Munduan zehar hainbat herrialdetan aurkezten ari dira eta gustura agertu da Zubiaurre.

Iaz lehenengo jokoa, gaur bigarrena, ‘Maeiour’ izenekoa, aurkeztu du Eibarrek Azokan. «Joko laburrak dira, eta helburua haurrek arkatza eta papera hartzeko gogoa piztea da. «Lehenengoarekin lortu genuelakoan gaude».

Euskal Herrian bideo jokoen industrian uste baino euskaldun gehiago ari direlakoan daude. Zubiaurre munduan zehar dabil finantziazio bila eta anekdota kontatu du. «Tokyon espainiar garatzaileekin afaltzen ari nintzen eta bat-batean euskaraz hizketan entzun nituen bi pertsona.  Donostiarrak ziren. Uste duguna baino jende gehiago dabil lanean».

Gehienak atzerrira doaz Aizpururen esanetan. «Hemen estudio txikiak ari gara lanean baina bakoitzak bere bidea egiten du».

Ez dute elkar ezagutzen. «Aurrera begira komunitatea sortzea eta inbertsioa falta zaigu», adierazi dute.

Gazte Eztanda! 

Gazte Eztanda!-ren ospakizunen barruan kokatu da saioa baina ez da eguneko ekitaldi bakarra. Elkarrekin bazkaldu dute Kurutziaga Ikastolan eta arratsaldean festa giroak EuskarAbenturaren eskutik egingo duten ginkanarekin jarraituko du. 17.00etatik 20.00etara, gunez gune, Landakon zehar zortzi proba egingo dituzte. Gainditzen dutenean kartulina jaso eta ‘Eztanda’ hitza osatu arte.

Egunari amaiera emateko Electropottotte eta OstiKda elektrotxarangak arituko dira giroa alaitzen.