Lehorreratu eta, Meloniren traben gainetik, itsasoan dira berriz Geo Barents eta Ocean Viking
Giorgia Meloni Italiako lehen ministro ultraeskuindarrak ezarritako trabak gaindituta, Geo Barents eta Ocean Viking ontziek berriz ekin diote Mediterraneo erdialdean jendea erreskatatzeari. 85 pertsona lehorreratu dira asteazken goiz honetan Tarentoko portuan.
Mugarik Gabeko Medikuen (MSF) Geo Barents itsasontziak eta SOS Méditerranée erakundearen Ocean Viking ontziak Mediterraneo erdialdean erreskateak egiten hasi dira berriro, Giorgia Meloni ultraeskuindarraren Italiako Gobernuak GKEen erreskateei buruzko arau zorrotzagoak onartu ondoren.
Asteazken goiz honetan Tarentoko portura (Apulia, hegoaldea) iritsi den MSFren itsasontziak 85 pertsona lehorreratu ditu, eta agintariek arau guztiak bete dituztela egiaztatu ostean itsasoratu ahal izan da berriz. Izan ere, dekretu berriak isunak jartzea edo ontzia konfiskatzea aurreikusten du, arau berriak bete ezean.
«Gure operazioak ordezkatzen dituzten arte, esku hartzen jarraituko dugu pertsonak itzuli ez ditzaten edo ito ez daitezen: 25.000 hil dira 2014tik, 1.400 azken urtean bakarrik», esan die Juan Matias Gil misio-buruak hedabideei, asteazken goizean ontzia porturatu ostean.
Geo Barentsen 85 pertsona zihoazen, horietatik 9 ziren adingabeak. Tripulazioak erreskate-operazio bakar batean 41 migratzaile salbatu zituen eta joan den asteburuan salbamendu bat egin zuen merkataritza-ontzi batetik 44 jaso zituen.
Italiak orain lehorreratzeak berehala baimentzen ditu –horrek galarazi egiten die ontzi humanitarioei beste migratzaile ontzi batzuei laguntzea–, eta ontziak Italiako lurralde osora bidaltzen ditu porturatzera, baita herrialdearen ipar-erdialdera ere, eta ez gertuen dagoen Siziliara. Hori dela eta, ontzi humanitarioak erreskate-eremutik kanpo egoten dira zenbait egunez.
Dekretuak administrazio-zehapenen araubide bat aplikatzea aurreikusten du, zigor-zehapenen araubidea aplikatu beharrean, eta, gainera, «itsasontzia administratiboki atxilotu ahal izango du (haren aurka errekurtsoa aurkez daiteke), eta debekatutako jokabidea errepikatzekotan, hura konfiskatu ahal izango du, kautelazko enbargoa egin ondoren».
«Geo Barents konfiskatzea baztertzen dugu, ez dago horretarako arrazoirik. Diru gehiago gastatzen ari gara abokatuetan bilaketa eta erreskatean baino. Paradoxa bat da, barregarria. Bizitzak salbatzen ari gara, eta abokatuei kontsulta egiten diegu neurri bakoitza, arau berri bakoitza, legeriarekin bat datorren ikusteko, nazioarteko arauak barne», esan zuen Gilek, eta Italiako araudi berria «nazioarteko zuzenbidearen aurkakoa» dela azpimarratu zuen.
Ocean Vikingek erreskateei ekin die berriro Mediterraneo erdialdean, Italiako Ravenako portutik (iparraldea) itsasoratu ostean. Italiako Gobernuak duela astebete zuzendu zuen portu horretara.
Ontzia arratsaldeko lehen orduan atera da Ravenatik, Italiako kostalde adriatikoan, 113 migratzaile lehorreratu ondoren. Tartean, hainbat adingabe, 20 eguneko haurtxo bat barne, eta ziur aski datorren ostiralean, hilak 6, iritsiko da Mediterraneo erdialdeko nazioarteko uretara.