42 familiak haien seme-alabak txertatu ez zituen erizaina salatu dute Kabiezesen
Santurtziko 42 bat umeren gurasoek Kabiezesko osasun zentroko erizain bat salatuko dute seme-alabak itxuraz txertatu ez zituelako. Osakidetzak egiaztatu zuen adingabe horietako gehienak ez daudela txertatuta. Kaltetuek osasun-langilea gaitasungabetzeko eskatu dute.
Kabiezeseko 42 familiak salaketa jarri dute Barakaldoko Instrukzioko 4 zenbakiko Epaitegian, ustez Santurtziko auzo horretako osasun-zentroan seme-alabak txertatu ez zituen erizainaren aurka. Kaltetuek osasun-langilea gaitasungabetzeko eskatu dute, eta justiziak erabaki dezala zer erantzukizun izan duen Osakidetzak gertakari horietan.
Santurtziko auzo honetako osasun-zentroko adingabeen txertaketa okerra izan zitekeela jakin zenetik, Osakidetza eta Osasun Saileko Osasun Publikoko Zuzendaritza proba serologikoak egiten hasi ziren adingabe horien immunitate-maila zein zen jakiteko. Urrian, lehen taldeari egindako proben ondoren, egiaztatu ahal izan da gehienak ez zeudela behar bezala immunizatuta.
Horrezkero, Osasun Publikoko Zuzendaritzak erabaki zuen immunitaterik ez zuten adingabeei txertoak ematea, eta txertaketa oker hori atzeman den talde osora zabaltzea kasu bakoitzaren analisia.
Lakuako Osasun Sailak espediente bat ireki zion erizainari baina, geroztik, Osakidetzak ez du kasuari buruzko informazio gehiagorik eman. Horregatik, 42 familiak erizainari auzitegietan salaketa jartzea erabaki dute. Instrukzioa bide penaletik egingo da, eta orain arte salaketa jarri duten guraso guztiei hitza emango zaie.