‘Maite duzun herria. Egingo dugu’, EH Bilduren hauteskunde kanpainako leloa
Unai Urruzuno EH Bilduren Mahai Politikoko bozeramaileak agerraldia egin du Donostian, udal eta foru hauteskundeak deitu diren egunean. Hauteskunde kanpainako leloa aurkeztu du: ‘Maite duzun herria. Egingo dugu’.
Unai Urruzuno EH Bilduren Mahai Politikoko bozeramaileak aurkeztu du astearte honetan subiranisten hauteskunde kanpainako leloa: ‘Maite duzun herria. Egingo dugu’.
«Herri honek eta hemen bizi eta lan egiten duten pertsonek guretzat zer esan nahi duten transmititzen saiatzen den leloa da hau eta, era berean, hauteskunde hitzordu berri honetarako daukagun anbizioa ere agerian utzi nahi du. Guk herri hau maite dugulako eta behar dituen konponbideak praktikan jartzeko gure esku dagoen guztia egingo dugulako», azaldu du Donostian egindako agerraldian.
Bertan nabarmendu duenez, Estatuko Aldizkari Ofizialean argitaratu ondoren, «gaur deitu dira ofizialki udal eta foru hauteskundeak eta hauteskunde autonomikoak Nafarroan. Eta EH Bildu ilusioz beteta eta prest dago erronka berri honi aurre egiteko».
Dioenez, «ezegonkortasun ekonomikoak eragindako testuinguruan jokatuko dira hauteskunde hauek. Ukrainako gerrak are gehiago sakondu du ezegonkortasun ekonomikoa». Baina «EH Bildu baikor, ilusioz eta azken hauteskundeetako hazkunde iraunkorrari eusteko konfiantzaz aurkeztuko da hauteskunde hauetara.
«Azken urteetan egindako lanaren konfiantzarekin aurkezten gara. Eta gehiago izateko eta gure presentzia eta botere instituzionala handitzeko asmoz aurkezten gara, jendearen interesak babesten jarraitzeko. Ezker independentista gobernatzeko bokazioarekin aurkeztuko da hauteskunde hauetara, eremu guztietan herri gisa hazteko eta euskal herritarrak zaintzeko», gaineratu du.
Posta bidez bozkatu ahal izateko prozedura
Hauteskundeetarako deialdi ofizialarekin, abian jarri da herritarrek posta bidez bozkatu ahal izateko prozedura. EH Bilduk herrialde bakoitzeko telefono zenbaki bana jarri du herritarren eskura, gai horrekin zerikusia duen edozein kontsulta egiteko.