Bilbon euskararen erabilera indartzeko ekimenak aurkeztu ditu Aburtok

Juan Mari Aburto Bilboko alkate eta berrautaketarako EAJren hautagaiak hurrengo agintaldian euskara bultzatzeko sustatu asmo dituen ekimenak aurkeztu ditu astearte honetan, Bilbo «Euskadin euskaldun gehien hiriburua» dela azpimarratuz.

Juan Mari Aburto Bilboko alkate eta berrautaketarako hautagai jeltzaleak euskarak Bilbon duen garrantzia aldarrikatu du astearte honetan eta hirian haren erabilera sustatzeko eta indartzeko ekimen batzuen berri eman du.

Hauteskunde ekitaldia Plaza Berrian egin da, Euskaltzaindiaren eraikinaren aurrean. Aburtorekin batera Ana Otadui Batzar Nagusietarako Bilboko barrutiko zerrendaburu eta EAJk Bizkaiko Parlamenturako aurkezten duen presidentegaia egon da, EAJk Bilboko Udalerako aurkeztu duen hautagai zerrendako zinegotziez gain, «euskaraz komunikatzen» direnak eta «euskararen alde» lan egiten dutenak.

Hiriari dagokionez, eta elebitan eginiko hitzartze batean, Aburtok azpimarratu du Bilbo dela «Euskadin euskaldun gehien eta euskara ezagutzen duten pertsona gehien dituen hiriburua». Egoera horretara iristeko arrazoien artean, alkateak nabarmendu ditu arrazoi kulturak eta erabaki pertsonalak, baina batez ere «EAJk euskara ikasteko, euskararen erabilera sustatzeko eta euskarazko sorkuntza bultzatzeko abiarazi dituen politiken emaitza da».

Besteak beste, Aburtok hurrengo agintaldian euskararen aldeko garatu nahi dituen ekimenen berri eman du, hala nola Bilboko Euskararen Aholku Batzordea indartzea; euskara sustatzen duten tokiko eragileekiko etengabeko koordinazioa eta babesa; Bilboko euskaltegietan matrikulazioa sustatzeko kanpainak; euskararen aldeko gizarte, erakunde zein parte-hartze bidezko ekimenetan modu aktiboan parte-hartzea; euskarazko kultur adierazpideak sustatzea; euskara saltokietan, ostalaritzan, kirolean, aisialdian eta hiriko bestelako esparru eta dinamika sozialetan sustatzeko programak bultzatzea; eta udal zerbitzuek erabiltzen dituzten aplikazio, web eta tresna teknologikoetan euskararen erabilera indartzea.

ErNE sindikatuaren protesta

Ekitaldia hasi aurretik, ErNE sindikatuko kide batzuek protesta egin dute plazan, Amaia Arregi Segurtasun Saileko zinegotziaren kontrako afixak eramanez. Han zeuden udaltzainek aginduta, alde egin dute manifestariek ekitaldi oztopatu gabe.