Gazteen langabezia tasak %20a gainditu izanak kezka eragin du Txinan
Hausnarketa abiatu dute Txinan hirietako gazteen langabezia tasak nabarmen gora egin duelako. Momentuz, ez dute aldikako daturik emango. Beren lehenengo egitekoa ikastea dela adierazi dute agintariek.
Txinak bertan behera utzi du gazteen hiriko langabezia tasaren argitalpena abuztu honetatik, «lan estatistiken hobekuntza eta optimizazioa eskatzen duten aldaketa ekonomiko eta sozialengatik», adierazleak %20tik gorako markak hautsi ondotik.
Fu Linghui Estatistika Bulego Nazionaleko bozeramaileak astearte honetan azaldu duenez, azken urteetan ikasle kopuruak gora egin du Txinako hirietan, eta horrek zalantzak sortzen ditu enplegu inkestetan «sartu» behar diren ala ez.
Datu ofizialen arabera, 2022an 16 eta 24 urte bitarteko 96 milioi gazte baino gehiago zeuden hirian, eta horietatik 65 milioi baino gehiago ikasleak ziren.
«Ikasleen zeregin nagusia ikastea da, eta iritzi desberdinak daude graduatu aurretik lan bila dabiltzanak lan indarraren zatitzat hartu behar diren ala ez», adierazi du bozeramaileak.
Era berean, Bulegoak adierazi zuenez, egoiliarren hezkuntza maila handitzearekin batera, gazteek ikasketa denbora luzatu egiten dute, eta horrek «adin tartea berrikusteko beharra planteatzen du, talde hori definitzeko», orain arte 16 eta 24 urte bitarteko adin tartean sartuta baitzeuden.
Txinako hiriko gazteen langabezia tasa ofiziala 2018an hasi zen zenbatzen, eta ekainean beste gailur historiko batera iritsi zen: %21,3ra.
Geldotze orokorra
Urtearen hasiera oparoaren ondoren, pandemiaren osteko Txinako ekonomiaren susperraldiak geldotzearen zantzuak ematen ditu, bigarren hiruhilekoan espero baino gutxiago hazi baita (+%6,3).
Estatuko eta nazioarteko eskari txikia, deflazio arriskuak eta nahikoa estimulu ez izatea, hondoa jo ez duen higiezinen krisia eta sektore pribatuan konfiantzarik ez izatea dira analistek munduko bigarren ekonomia handienean gertatzen dena azaltzeko erabiltzen dituzten arrazoi nagusiak.