Urriaren 7tik 20.000 haur «infernuan» jaio dira Gazan, Unicefen arabera

Unicef Haurren Laguntzarako Nazio Batuen Funtsaren arabera, urriaren 7az geroztik 20.000 haur jaio dira Gazan. Haurdun dauden amak, erditu berri dutenak zein jaioberriak egoera «prekario» eta arriskutsuan daudela jakinarazi du Unicefeko bozeramaile Tess Ingramek.

20.000 haur inguru jaio dira «Gazako infernuan», urriaren 7az geroztik hamar minuturo jaiotzen dira, Unicef Haurren Laguntzarako Nazio Batuen Funtsaren arabera.

Nazio Batuen agentziak ostiral honetan adierazi duenez, gatazkaren aurretik Gazan zegoen haurren eta amen heriotza-tasaren egoera «prekarioak» okerrera egin du osasun-sistemaren kolapsoaren ondorioz, eta hori berreraikitzeko «berehalako ekintza trinkoak» eskatu zituen.

«Amek zailtasun imajinaezinak dituzte arreta medikoa, nutrizioa eta erditzearen aurretik, erditzean, eta ondoren, babes egokia izateko», esan du Unicefeko bozeramaile Tess Ingramek. Eta nabarmendu du baldintza horiek arriskuan jartzen dituztela amak berezko abortuak izateko, erditze goiztiarrak edota amen eta haurren hilkortasuna eta trauma emozional ugari izateko.

Ingram joan den astean egon zen Rafaheko emiratiar ospitalean, Gazan haurdun dauden emakume gehienak artatzen dituen ospitalean, eta jakinarazi zuen pilaketa-baldintzek eta baliabide mugatuek behartu egiten dituztela medikuak amei alta ematera zesarea bat egin eta hiru ordu eskasera.

Bere testigantzan, Imanen kasua ekarri zuen gogora, «zortzi hilabeteko haurdun zegoela Israelen bonbardaketetatik ihes egin zuen emakume honek, erditu ondoren ospitalean dago infekzio larri batekin, eta ezin du bere haurra artatu».

Nabarmendu zuen, halaber, oldarraldiaren traumak zuzenean eragiten diela jaioberriei, eta horrek desnutrizio-tasa handiagoak, garapen-arazoak eta beste osasun-arazo batzuk eragiten dituela. «Jaioberriak sufritzen ikusteak, ama batzuk odolustuta hiltzen diren bitartean, loa kendu beharko liguke guztioi», esan zuen.

UNICEFeko bozeramaileak «funtsezko» su-eten humanitarioa eskatu du haurdun dauden emakumeentzat, amentzat eta jaioberrientzat, bi urtetik beherako 135.000 haur desnutrizio larriko arriskuan daudela salatuz.

142 hildako azken 24 orduetan

Egunetik egunera hildakoen kopuruak gora egiten du Gazan, azken 24 orduetan 142 hildako izan direla jakinarazi du lurraldeko Osasun Ministerioak.

Orotara, 24.762 hildako zenbatu dituzte ostiral honetara arte.