Mecanerren greba mugagabearen aldeko apustua egin du ELAk, «deslokalizazioari aurre egiteko»

Urdulizko Mecaner enpresan enplegu erregulazioko espedientearen kontsulta epea hasteko hilabete falta denean, ELA sindikatuak greba mugagabea hastea «inoiz baino beharrezkoagoa» dela defendatu du. Enpresa bideragarria dela nabarmendu du, eta deslokalizazioaren aurka agertu da berriz.

Hainbat greba egunen ondoren, Urdulizko Mecaner enpresan aurrerapen gutxi egin dira irailean enpresa ixteko asmoa zegoela jakinarazi zenetik. ELAk hasieratik egin zuen greba mugagabea deitzearen alde, «enplegua eta enpresaren bideragarritasuna defendatzeko». Eta horren premia «inoiz baino garrantzitsuagoa» dela irizten dio orain.

Sindikatuak behin eta berriz salatu du itxieraren atzean dagoela «planta deslokalizatzeko asmoa». Hori dela eta, ELAk hasiera-hasieratik planteatu zuen greba mugagabea, baina gainerako sindikatuak ez zetozen bat planteamendu horrekin.

Orain, enplegu erregulazioko espedientearen kontsultaldia hasteko hilabete falta denean, ELAk greba mugagabea «inoiz baino beharrezkoagoa» dela defendatu du. «Stellantis taldearen aurrean mobilizazioak indartzeko unea da, 148 langile kalean gera ez daitezen, enpresak irabaziak izan dituen arren. Horregatik, ELAk bere apustua berresten du», adierazi du ohar baten bitartez.

Era berean, ELAk erakundeei eskatu die «politika publikoak aldatzeko eta irtenbide baten bila lan egiteko, enplegua suntsitu edo Mecanerreko plantillaren lan baldintzak okertu gabe». Sindikatuaren ustez, ezin da onartu Stellantisek Mecaner ixtea, «enpresa bideragarria baita».

Azkenik, ELAk greba aldarrikatu du Mecanerreko langileen eskubideak defendatzeko tresna gisa, eta Urdulizko lantegia salbatzeko borroka areagotzearen alde egiten du.