Lakuaren «esku hartze falta» eta «sekretismoa» salatu dute Glavistako langileek

SPRIren Bilboko egoitzaren aurrean egindako kontzentrazioan, Glavistako langile batzordeak adierazi du Lakuako Gobernuak ez diela bilera eskaerei erantzun. Beldur da Guardian enpresa «ez ote den denbora pasatzen uzten ari langile guztiak kaleratzeko eta espekulatzen jarraitzeko».

Autoetako haizetakoak ekoizten dituen Laudioko Glavista (2020ra arte Autoglas deitzen zena) enpresako langileak berriro mobilizatu dira gaur SPRIk (Enpresa Garapenerako Euskal Agentzia) Bilbon duen egoitzaren aurrean. Bertan, enpresa batzordeak salatu du Arantxa Tapia buru duen Ekonomiaren Garapena eta Azpiegituretako Sailak ez duela informaziorik ematen.

Parter Capital eta Guardianek, enpresaren akziodun eta hartzekodun nagusiak, hurrenez hurren, konpainia hiltzen utzi dutela salatu dute. Gogorarazi dutenez, Guardianek 2020an, «aldez aurretik abisatu gabe eta ustekabean», erabaki zuen enpresa Parter Capital inbertsio funtsari saltzea. Gaur egun, Auzitegi Nazional espainiarra ikertzen ari da funts hori, Alu Iberica (Alcoa izandakoa) auzian izandako irregulartasun ugariengatik, bat-batean egindako salmenta prozesu batean; gaur egun ez dago horren xehetasunik.

Salmenta hori egin zenean, langileak okerrenaren beldur ziren. Hiru urte geroago, susmoak baieztatu egin ziren. Lantegia geldirik dago, hartzekodunen konkurtsoan 2023ko apiriletik, eta iraungitzeko enplegu erregulazioko espediente bat izapidetzen ari da plantilla osoarentzat. Urte osoan zehar hainbat mobilizazio egin dituzte langileek.

2023aren amaieran irtenbide bat zegoela zirudien. Amine enpresak konpainia erosteko interesa erakutsi zuen eta Parter Capitalekin negoziatzen hasi zen. Hala ere, arazo bat zegoen: Guardianek 2020an saldu zion enpresa Parter Capitali, baina ez haren lurrak. Aminek dena erosi nahi zuen, baina Guardianek ez zituen lurrak saldu nahi.

«Inbertsiorik eza, kontrataziorik gabeko plantillaren etengabeko murrizketa, zuzendaritzaren jarrera guztiz pasiboa eta Guardian multinazionalak Glavistarekiko duen jarrera lotsagarria, edozein irtenbide blokeatuz, Laudioko plantarako proiektu gabezia nabarmenaren adierazle dira. Utzikeria eta interesik eza nabarmenak», adierazi zuen ELAk.

Orain, dena korapilatu da berriz. Amine merkataritza erregistroan desegin egin da. Langileek salatu dutenez, «Guardian eta Amineren arteko ustezko elkarrizketak eta negoziazioak, gatazkari irtenbidea emateko eta Lakuaren bitartekaritzarekin, erabateko sekretua dira oraindik, eta ez dute ezer konpontzen».

«Zergatik ez digute jakinarazten negoziazioen bideak ez duela fruiturik eman? Zergatik ez da Glavista jarraitzeko berehalako beste irtenbide bat bilatzen ari? Enpresa erabaki espekulatzaile eta suntsitzaileak ezin dira jendearen gainetik egon, ezta erakundeen gainetik ere. Gaur egun, abandonatutako lursail batek 200 pertsonarentzat industria proiektu batek baino balio handiagoa du. Eta hori ahalbidetzen ari dira erakunde publikoak», adierazi dute langileek.

Horregatik, Lakuako Gobernuaren esku-hartze zuzena eskatu dute, eta berehala jarduteko urgentzia dagoela nabarmendu.