Sare: «Emakumea sistema patriarkalaren arabera dagokion tokian jartzeko erabiltzen da kartzela»
Martxoaren 8aren atarian, Sarek beste urte batez plazaratu nahi izan du euskal emakume presoek bizi duten egoera «gordina». Zigor hirukoitza pairatzen dutela nabarmendu dute: «Soziala, pertsonala eta penala»
Martxoaren 8ari begira, eta Euskal Herriko Mugimendu Feministaren aldarriarekin bat eginez, Sarek euskal emakume presoen egoera plazaratu nahi izan du. Azaldu duenez, «emakume presoak izateagatik urte luzeetan are bakartuago eta are urrunduago egon izan dira, sistema patriarkalaren adierazle garbienetakoa den kartzela sisteman zigor krudelago bat jasanez».
«Salbuespeneko espetxe politikaren pean preso egoteak espetxealdia gogorrago egiten badu, emakumeen kasuan gizonentzako soilik pentsatua den eremu batean zigorra bete behar izatea gehitzen zaio», gehitu du Sarek.
Horretaz gain, kartzelak emakumea «sistema patriarkalaren arabera dagokion tokian jartzeko» erabiltzen dituztela salatu du: «”Emakume onak” birsortzeko fabrikak bilakatzen dira, tailerrak, janzkera araudiak edo sexualitatea bizitzeko mugen bitartez.
Espetxeak landu beharreko eremutzat ere hartu behar direla nabarmendu Sarek: «Espetxe-errealitate gordina behin betiko amaitzea gizarte osoari dagokigu, eta, horretarako, eta etxeratze-prozesua garatu ahal izateko, konponbiderako giltza izaten jarraitu behar dugu, kaleetan, esparru politikoan, sindikalean eta sozialean… hainbeste urtetako konfrontazioaren ondoren gizarte gisa nahi dugun etorkizunari ateak irekitzeko».