Laudioko Autoglas-Glavistako langileak kaleratzeko espedientearen prozesua berrabiarazi da

Sei hilabete baino gehiagoko etenaldiaren ostean, Laudioko Autoglas-Glavista enpresako enplegu erregulazioko espedientearen (EEE) prozesu judiziala berrabiarazi egin da. 200 langileren kaleratzea dago airean.

Sei hilabete etenda egon ostean, Laudioko Autoglas-Glavistako enplegu erregulazioko espedientearen (ERE) prozesua berrabiarazi egin da epaitegietan, ELAk jakinarazi duenez.

Sindikatu horrek ohar batean azaldu duenez, ELAk eskatutako laguntza judizialaren ondorioz zegoen etenda Autoglaseko enplegu erregulazioko espedientearen prozesua; hainbat informazio eskatzen ziren eta Guardian Taldeko eta Parter Capital Taldeko enpresen parte-hartzea.

Hala, informazioa eman eta enpresak prozesuan parte hartzeko sei hilabete igaro ondoren, astearte honetan berrekingo zaio enpresaren kaleratze kolektiboaren prozesuari.

2023ko urriaren 18an, Gasteizko merkataritza arloko epaitegiak 10 eguneko epea eman zien Guardian Taldeko eta Parter Capital Taldeko hainbat sozietateri salerosketako dokumentazioa entregatzeko, eta, bitartean, EEEaren prozedura geldiarazi zuen. ELAk adierazi duenez, agiri horiek ez dira aurkeztu apirilera arte (6 hilabete geroago). Hori dela eta, epaitegiak dei egin die auzian inplikatutako aldeei enplegu erregulazioko espedientearen prozesuari berriro ekiteko.

Autoglas-Glavistak autoetarako haizetakoak egiten ditu; 2020ra arte Guardian Laudioko kide izan zen. Enpresaren asmoa 200 langile kaleratu eta lantegia ixtea da. Horren aurka mobilizazio ugari egin dituzte iragan udazkenetik. Horren atzean operazio espekulatibo bat dagoela salatu du plantillak, «funts putreak» tarteko, erreportaje honetan azaldu zutenez.