Beste helegite bat jartzeko aukera eman dio Justizia britainarrak Assangeri
Julian Assangek beste helegite bat jarri ahal izatea onartu du Britainia Handiko Justiziak, estradizioaren aurka. Berri pozgarria bezain «bitxia» izan dela esan dute gertukoek, eta orain, hilabete izango du apelazioa prestatu eta Estatu Batuetara eraman ez dezaten galdegiteko.
Londreseko Auzitegi Nagusiak Julian Assange Wikileakseko sortzailearen aldeko epaia eman du astelehen honetan, Estatu Batuetara estraditatzeko aginduaren aurka beste helegite bat jartzeko aukera emanez. Milaka dokumentu sekretu zabaltzearen delitua galdegiten diote.
Erabaki horrek aukera ematen dio Australiako herritarrari Washingtondik agindutako bermeak zalantzan jartzeko, estraditatua izan ondoren epaiketa nola egingo den jakiteko, BBC britainiarraren arabera.
Assange Belmarsheko kartzelan dago preso, Britainia Handiko hego-mendebaldean, eta orain hilabete batzuk izango ditu bere apelazioa prestatzeko. Hasiera batean, AEBko auzitegiek adierazpen askatasunerako eskubidea babestuko duten ala ez aztertuko du.
Kazetari australiarrak defendatu duenez, 2010ean jakinarazitako informazioek Estatu Batuek egindako gerra krimenak ezagutzera emateko balio izan zuten. Assangeren kontrako auziak arrazoi politikoak dituela azpimarratu dute haren abokatuek.
Assangeren defentsak otsailean eskatu zuen kasuaren zatirik handiena inpugnatzea estradizioa saihesteko. Hala ere, kasuaz arduratzen diren epaileek abokatuen argudio gehienak baztertu zituzten, baina Assangeren segurtasunerako bermeak eskatu zizkieten Ameriketako Estatu Batuei.
Halere, AEBetako Justiziaren esku
Assangeko ordezkariek ohartarazi dutenez, Joe Bidenen Administrazioak bermeak eskaini arren, AEBetako Justiziak legea aplika dezake, «Gobernuak egiten duena edo esaten duena kontuan hartu gabe», Sky News Erresuma Batuko telebista kateak jaso duenaren arabera.
Erresuma Batuko Gobernuak argi berdea eman zion lekualdatzeari 2022ko ekainean, baina Assange, zazpi urte inguru Ekuadorrek Londresen duen enbaxadan errefuxiatuta egon ondoren, erabaki hori blokeatzen saiatu da. AEBetako Espioitza Legea urratzea leporatzen diote, eta 175 urte arteko kartzela-zigorra ezartzeko arriskua dago.
Otsaileko bistetan, Wikileaksen sortzailearen abokatuek zalantzan jarri zuten Estatu Batuetan epaiketa justu bat jaso zezakeenik, eta prozesu horretan oinarrizko askatasunak jokoan daudela aldarrikatu zuten, Assangeren ekintzak kazetaritzaren esparruan sartuko liratekeelako eta babes berezia merezi izango luketelako.
«Berri onak» ingurukoen iritziz
Stella Asangek, Assangeren emazteak, esan du familia «lasaituta» dagoela Gorenaren epaiarekin, baina zalantzan jarri du «noiz arte iraungo duen» bere senarraren aurkako auziak, eta Joe Biden AEBko presidenteari eta agintari eskudunei «kasu hau orain bertan behera uzteko» eskatu die. «Ez utzi honek luzaroago jarrai dezan», erregutu du.
Britainia Handiko Justiziaren erabakiaren lehen erreakzioetako bat Amnistia Internazionala gobernuz kanpoko erakundearena izan da; izan ere, Londresko Auzitegi Gorenaren epaia «albiste positiboa baina bitxia da Julian Assangerentzat eta prentsa askatasunaren defendatzaile guztientzat».
«Auzitegi Nagusiak zuzen ondorioztatu du, Estatu Batuetara estraditatzen badute, Assangek abusu larriak jasateko arriskua izango du, luzaroko isolamendu erregimena barne, eta horrek torturaren eta beste tratu txar batzuen debekua urratuko luke», esan du Simon Crowther Amnistiaren lege-aholkulariak.
Halaber, Crowtherrek salatu duenez, Ameriketako Estatu Batuek Assange auzipetzeko egindako saiakerek «mundu osoko prentsa askatasuna arriskuan jartzen dute», eta «Estatu Batuek nazioarteko zuzenbidearen arabera dituzten betebeharrak eta adierazpen askatasunarekin duten konpromisoa barregarri uzten dituzte».