TAOren udako ordutegia jarri da martxan astelehen honetan Bilbon
Bilboko TAOren udako ordutegia jarri da martxan astelehen honetan. Udalak nabarmendu duenez, uztaileko eta abuztuko larunbatetan ez da zerbitzurik izango, eta abuztuan erabiltzaileek ez dute ordaindu beharko autoa arratsaldez aparkatzeagatik.
Bilboko TAO kaleko araututako aparkalekuen zerbitzuak udako ordutegia jarri du martxan astelehen honetan, uztailaren 1ean, eta abuztuaren 31ra bitarte izango da indarrean, Bilboko Udaleko iturriek jakinarazi dutenez.
Modu honetan, uztaileko eta abuztuko larunbatetan ez da zerbitzurik izango, eta abuztuan erabiltzaileek ez dute ordaindu beharko autoa arratsaldez aparkatzeagatik. Abuztuko ordutegia 9.00etatik 13.30era izango da bizileku eremuan, eta 14.00ak arte eremu intentsiboan.
Uztailaren 25ean eta 31n eta abuztuaren 15ean eta 25ean ez da TAO zerbitzurik izango egun osoan jaiegunak direlako. Zerbitzua irailaren 1ean hasiko da berriro ohiko ordutegian funtzionatzen.
Bestalde, TAO zerbitzuak gune berria du astelehen honetatik, Olabeaga gehitu baita sarera. Horrela, eremu horretan bizi diren pertsonek TAOk araututako gunea izango dute aparkatzeko. Berdea eta Berdea-L sektoreak egongo dira gunean, eta auzotarrek egoiliarren txartela eskatu dezakete sektore horietan denbora mugarik gabe aparkatu ahal izateko.
TAO eremu berria Olabeagan
Olabeagako TAO eremu berriak urteko B tarifa izango du 2024ko ekitaldian. Tarifa hori 48 eurokoa da urtean, edo, egoki bada, hiruhileko naturalen arabera banatuta.
TAOaren ordutegia bizileku eremuari dagokiona izango da Olabeagan, hau da, astelehenetik ostiralera 9.00etatik 13.30era eta 15.00etatik 19.00etara; larunbatetan ez da TAOrik egongo. Abuztuan, hiriko gainerako lekuetan bezala, goizeko ordutegian bakarrik funtzionatuko du.