Lan osasuna «lehentasuna» izatea eskatu dio ELA sindikatuak Torres lehendakariordeari

Asteazken honetan egindako bileran, ELAk Mikel Torres lehendakariordeari eskatu dio lan osasuna lehentasuntzat hartzeko, eta patronalaren gain jar dezala azpimarra lan gatazkak murrizteko. Lan gatazkei dagokionez «patronalaren jarreran eta estrategian jar dezala azpimarra» galdegin du sindikatuak.

ELA sindikatua Mikel Torres Lakuako lehendakariordearekin bildu da asteazken honetan eta «hausnarketa zintzoa egin dezala» eskatu dio, «elkarrizketa sozialeko mahaien porrot eta eraginkortasun faltaz».

Mitxel Lakuntza idazkari nagusia buru, ELAko Batzorde Eragileko ordezkaritza bat bildu da Mikel Torres lehendakariordearekin Lakuak Bilbon duen egoitzan, non, ohar baten bidez adierazi duenez, sindikatuak bere «kezkak eta proposamenak» azaldu dizkio Lakuako ordezkariari.

Iturri beraren arabera, sindikatuak «borondatea» agertu du lehendakariordearekin eta Gobernuarekin «aldebiko harremana izateko, akordio posibleak lantzeko eta aztertzeko». Sindikatuak gogorarazi duenez, joan den uztailean 80 proposamen baino gehiagoko dokumentu bat eman zion lehendakariari

Era berean, ELAk bere kezka azaldu du Gobernuak erakutsitako «jarraikortasun ildoarekin». «PSEren eta EAJren arteko gobernu akordioak ez du aurreko gobernuen ildo nagusiak aldatzeko neurri zehatzik jasotzen, ezta aldaketarako benetako borondatea erakusten duten neurririk ere», gehitu du sindikatuak. «Zero defizitaren aldeko apustua jasotzen dute datorren urterako aurrekontu jarraibideek, eta horrek jarraikortasuna erakusten du».

Bestalde, ELAk Torresi eskatu dio lan osasuna «lehentasuntzat» har dezala, «EAEko lan istripuen eta lanbide gaixotasunen gehiegizko kopuruekin amaitzeko politikak bermatzeko». «Osalanen bultzadarik eta erabakitasun faltaren aurrean, langileen segurtasunaren eta bizitzaren gainetik onurak jartzen dituzten enpresentzako ikuskaritzak eta zigorrak areagotzea» eskatu du ELAk. Zentzu horretan, lan ikuskatzaileen kopurua 120ra handitzea defendatu du sindikatuak.

Parte hartzeko mahaiei dagokienez, hala nola Osalan, Lanbide, EGAB... ELAk lehendakariordeari eskatu dio «hausnarketa zintzoa» egin dezala «defizit demokratikoari eta elkarrizketa sozialeko mahaien porrotari» buruz. «Argi dago langile klasearen arazoak ez direla mahai horietan konpontzen, parte hartzen duten agenteen ezintasunak agerian uzten baitu eraginkortasun falta».

Era berean, ELAk Torresi politika propioak eskatu dizkio Lan Harremanen eta Gizarte Babesaren Euskal Esparrua lortzeko bidean; besteak beste, gure lurraldean LGS bat legez ezartzeko eskubidea barne har dezan. Ildo horretan, sindikatuaren eskaera onartzeko eskatu dio Lakuari etxeko langileek hitzarmen kolektibo bat izan dezaten.

Azkenik, eta lan gatazkei dagokienez, ELAk Lakuako arduradunei adierazi die «patronalaren jarreran eta estrategian jar dezala azpimarra». «Lan gatazkak murrizteko modurik onena patronalak jarrera aldatzea da, onartuz azken urteetan marka guztiak gainditu dituzten etekinen banaketaren beharra. Patronalak oinarrizko hobekuntzak onartzeari uko egin dionez, hala nola KPIaren igoerari edo soldata arrakalarekin amaitzeari, grebak dira hitzarmen gehiago eta hobeak lortzea ahalbidetzen duen tresna», gehitu du sindikatuak.

Confebaskekin ere bai

ELArekin bildu aurretik, Confebaskeko ordezkariak hartu ditu Torresek. Tamara Yague lehendakariak bere proposamenak helarazi dizkio lehendakariordeari eta «garapen ekonomiko-enpresarialaren, enpleguaren eta euskal gizartearen ongizatearen alde» lan egiteko prestutasuna adierazi dio, ohar batean azaldu duenez. Torresek esan du bilera «eraginkorra» izan dela.