Aita Mari Mediterraneorantz abiatu da bere 14. erreskate misioan

Aita Mari, Itsas Salbamendu Humanitarioa (SMH) gobernuz kanpoko erakundearen ontzia, Saguntoko portutik (Valentzia) abiatu da ostiral honetan, Mediterraneoan migratzaileei laguntza humanitarioa emateko bere 14. misioan.

Aita Mari laguntza humanitarioko ontzia Saguntotik irten da ostiral honetan, Mediterraneoan bere 14. misioa hasteko helburuarekin. Aurreko misioa portu honetan amaitu ostean, berriro itsasoratuko da, «gero eta larriagoa den migrazio-krisiari aurre egiteko», adierazi du ohar batean.

Azken hilabeteetan, oztopo garrantzitsuei aurre egin behar izan dietela nabarmendu du taldeak, hala nola, 76.000€-tik gorako portu-tasei eta Europako politika migratorioek mugak kanporatzeak eragiten duen egoera larriari, «migratzaileak, bereziki emakumeak eta haurrak, are gehiago kaltetuz».

Ildo horretan, Aita Marik gogoratu du «zailtasun horiei aurre egiten jarraitzen» diola, «gizartearen eta ‘14. misiora goaz’ bezalako kanpainen babesari esker, misio hau sostengatzeko eta portu urrunetako politiketatik eratorritako kostuak estaltzeko», gaineratu du.

Azaldu duenez, Aita Mariren bidaia «deialdi urgente» bati erantzuten dio: «Itsasoz ihes egitera behartutakoen duintasuna eta segurtasuna defendatzea». Hala, nazioarteko komunitateak «konponbideak eskaintzeko» ardura hartu behar duela azpimrratu du, bien bitartean «laguntza ematen eta Mediterraneoaren errealitatea ikusgai egiten» jarraituko duela gehituz.

‘14. misiora goaz’ kanpaina

Aita Mari itsasontzia kudeatzen duen Itsas Salbamendu Humanitarioa (SMH) GKEak lineako dohaintzen plataforma bat jarri du martxan, 20.000 euro bildu eta ostiral honetan abiatu den 14. misioa babesteko.

«Plataformak edozein pertsonari modu azkar eta seguru batean ekarpena egiteko aukera ematen dio, funtsezko kostuak estaltzeko, hala nola erregaiak, hornidura medikoak eta elikagaiak, eta Aita Mari erreskate-ontziaren mantentzea 14. misioan», adierazi du.

Dirua gobernuek «gure lana eragozteko» martxan jarritako oztopoak, hala nola «portu urrunak esleitzea edo legeak salbuesten gintuen tasak ezartzea», gainditzeko izango direla esan du GKEak.

«Gardentasuna SMH-ren oinarrizko lehentasun bat da, eta dohaintzen erabilerari buruzko txosten zehatzak eskaintzeko konpromisoa hartzen du, ekarpen bakoitzak misioan zuzeneko eragina izan dezan», adierazi du.

Horrela, kanpaina honek «ez du soilik operazioa finantzatu nahi, baizik eta Mediterraneoan erreskateak egiten jarraitzeko beharrezkoa den babes kolektiboa ikusgai egitea», nabarmendu du.

«Dohaintza bakoitza, tamaina edozein dela ere, funtsezko urratsa da Aita Mari behar duten pertsonei laguntzen jarraitzeko», azpimarratu du.