Pentsioak %2,8 igoko dira 2025ean Hego Euskal Herrian

Kotizaziopeko pentsioak %2,8 inguru igoko dira 2025ean Hego Euskal Herrian, azken lege erreforma jasotako errebalorizazio formula dela eta. Horrek, gutxi gorabehera, 565 euro gehiago ekarriko dizkie urtean batez beste erretiro pentsioa dutenei.

Kotizaziopeko pentsioak %2,8 igoko dira 2025ean Hego Euskal Herrian. Gutxienekoak eta kotizazio gabekoak kopuru horretatik gora igo beharko dira, pentsioen erreformaren azken blokean jaso zen bezala.

Estatistikako Institutu espainiarrak (INE) azaroko KPIaren (%2,4) datu aurreratua argitaratu du ostegun honetan eta, beraz, posible da aurreratzea 2025ean kotizaziopeko pentsioen balioa zenbat handituko den, aurreko hamabi hilabeteetako batez bestekoa eginda (kasu honetan, 2023ko abendua eta azaroa).

Igoera horrek kotizaziopeko pentsioak jasotzen dituzten 9,3 milioi pertsona ingururi eragiten die Estatuan, baita Estatuko Klase Pasiboen erregimenari dagozkion 720.148 pentsioei ere. Azken hauek ere indize berarekin handituko dira.

Gizarteratze Ministerioaren datuen arabera, errebalorizazioaren ondorioz, hilean 1.441 euroko pentsioa (erretiroko batez besteko pentsioa) jasotzen duen pentsiodunak 1.481 euro jasoko ditu hilean 2025ean, hau da, urtean 565 euro gehiago.

Era berean, 2025erako, genero arrakalaren osagarria %7,8 inguru igoko da (batez besteko KPI gehi %5 gehiago), eta horrek 35,6 euro inguruan jarriko du.

Zifrak abenduaren 13an berretsiko ira, KPIaren behin betiko datua argitaratzen denean.

Elma Saiz Inklusio, Gizarte Segurantza eta Migrazio ministroak ohar batean azpimarratu duenez, neurri hori «lasaitasunerako bermea da», eta pentsioen igoera «justizia sozial» dela defendatu du.