Urteko azken hilabetearekin batera Mutrikun Abendurock ekimena ospatzen da. Mutrikuko Rock Kolektiboaren ekimenez ospatzen den musika zikloa da honakoa, eta aurtengorako ere egitarau ederra prestatu dute. Dagoeneko igaro dira Aho Zakil Konekxion eta Bellun taldeen emanaldiak, eta herriko taldeak batzen dituen MRK Gaua ekimena. Asteburu honetan burutuko dira azken ekimenak, eta bide horretan abenduaren 27an Airu eta Las Sexpeares taldeak ariko dira zuzenean gaueko 22.00etatik aurrera. 28an, azkenik, Delirium Tremens taldearen txanda izango da luxuzko amaiera emanez Abendurock ekimenaren 20. edizio honi. Azken emanaldi honetarako sarrerak abenduaren 26an jarriko dira salgai gaztetxean bertan arratsaldeko 19.00etatik hamar euroen truke.

MRK

Musika harrobi polita egon da beti Mutrikun, eta egun ere uzta polita dago bertan. Gaztetxe gaineko entsegu lokaletan dozenaka talde sortu izan dira urte hauetan guztietan eta gaztetxeko agertokitik dozenaka talde igaro izan dira zuzeneko musikaren oasi bat bilakatuz herrian. MRK egiten duen lana handia da, ezinbestekoa herrian musika kultura zabaltzeko, eta musika talde berriak sortzeko.

Delirium Tremens

Bertako entsegu lokaletan gauzatu zen Delirium Tremens taldearen itzulera. Pandemia aurretik hasi ziren entseguak egiten Iñigo Muguruzaren omenaldian parte hartzeko, eta gerora suertatu zen disko berria eta zuzeneko emanaldiak egiteko ideia. 2022ko martxoan taldea agertokietara itzuli zenetik, bi disko berri kaleratu ditu bandak.  ‘Hordago’ diskoa izan zen lehena, eta duela zenbait aste ikusi du argia  ‘...Ta Nora?’  izeneko lana. Disko berriarekin batera bira berria abiatuko du taldeak, eta azaroan eskainiko duten emanaldi berezi batekin esango dute agur, taldea berriz ere lozorroan sartuz.


DELIRIUM TREMENS ZUZENEAN

28.12 MUTRIKU - Gaztetxea
01.04 AZPEITIA - Sanagustin kulturgunea
01.05 BILBO  - Kafe Antzokia ️
01.11 OÑATI -  Verduri Hall - Gaztelekua
01.18 GASTEIZ - Jimmy Jazz aretoa