Asteburu beroa izango du Izaro musikariak, eta bide horretan bi zuzeneko eskainiko ditu ‘Cerodenero’ kontzertu biraren azken txanpan. Ostiral gauez Tolosako Leidor aretoan ariko da 20.30etik aurrera. Sarrera guztiak agortu dira jada. Larunbatean, berriz, Galdakaon izango da hitzordua, arratsaldeko 20.00etan eta Torrezabal kultur Etxean ederrean. Oraindik sarrera bakan batzuk geratzen dira emanaldi honetarako, eta 10 euroen truke eskura daitezke Izaroren atari digitalean.

«Cerodenero»

Izaroren estudioko laugarren lan luzea da ‘Cerodenero’ disko kontzeptuala, eta 2024 urte osoan zehar diskoa aurkezten aritu da han-hemenka, makina emanaldi eskainiz. Euskal Herrian ez ezik, espainiar Estatuan, Mexikon, Kolonbian edo Ameriketako Estatu Batuetan aritu da, emanaldi akustikoak eta elektrikoak tartekatuz. A

tzean geratzen dira gitarra lagun egindako bakarkako lehen emanaldiak, 2016 urtean kaleratu zuen ‘Om’ debuteko diskoa, konsagrazioa izan zen ‘Eason’ lana, eta mugarri bilakatu zen ‘Limones en invierno’ disko eta limoi aroa. Laster beste ziklo bat itxiko du Izarok, eta aukera ederra izan daiteke asteburu honetakoa azken zuzenekoetaz gozatzeko.

Gabonetako diskoa

Donostian bizi den musikari bizkaitarra albiste iturri da azken boladan. Berriki disko berezi bat kaleratuko duela zabaldu du sare sozialetan, eta abenduaren hasieran ikusiko du argia ‘Gabonetan’ lana, eta disko berezi hori aurkezteko bi emanaldi eskainiko ditu Donostiako Kursaal aretoan abenduren 22 eta 23an.

Gainera, ‘Cerodenero’ diskoa eta bira agurtzeko emanaldi ikusgarria eskainiko du Barakaldoko BEC gunean. 2025 urteko maiatzaren 25ean izango da azken emanaldi hori, eta sarrerak oraindik eskuratu daitezke artistaren atari digitalean.