Olatz Salvador musikariak disko berria kaleratu du, eta bide horretan zuzeneko emanaldietan murgilduko da datozen aste eta hilabeteetan. Estudioko hirugarren lanaren aurkezpena Oñatiko Gaztelekuan egin zuen urriaren amaieran, eta asteburu honetan Gasteizen eta Errenterian ariko da zuzenean bere banda lagun. Ostiral gauez Jimmy Jazz aretoan joko dute, gaueko 20.30etatik aurrera. Larunbatean, berriz, Errenteriako Lekuona fabrikan izango da hitzordua. Bi emanaldietan Eire ariko da gaualdiak zabaltzen. Sarrerak dagoeneko salgai daude atari digitalean

Zainak eman

 2014 urtean hasi zen Olatz Salvador zuzeneko emanaldiak eskaintzen bere izenpean. Garaian Skakeitan taldean aritzen zen ere, eta lehen urteetan bi egitasmoak uztartu zituen Skakeitan taldeak agur esan zuen arte. Bidean estudioko hiru disko kaleratu ditu: 2018 ikusi zuen argia debuteko ‘Zintzilik’ (2018) lanak, eta 2021 urtean argitaratu zen ‘Aho uhal’. Azkenik egunotan kaleratu da horietako azkena ‘Zainak eman’ (2024) izenpean, eta beste behin Airaka zigiluaren babesean. Disko berrian hamar kantu berri barneratu ditu, eta horien artean bi lankidetza izan ditu. Izaro Andresek  ‘Zerbaiten zain’ kantuan abestu du, eta Alba Morenok ahotsa sartu du ‘Zarataz harago’ abestian. Musikalki orain artean landu dituen eremuetan murgiltzen da Olatz, eta era berean badira gauza berriak elektronika lanabesen aldetik. Zuzeneko emanaldietan Ander Zulaika (bateria), Mattin Saldias (gitarra), Jagoba Salvador (baxua) eta Esti Beraza (teklatua, sinteak eta azpi-ahotsak) musikariak izango ditu lagun.

Eire

Asteburu honetako bi emanaldiak Eire taldeak zabalduko ditu. Zumaian sorturiko bikoa da honakoa, eta egun hiruko moduan taularatzen dira zuzeneko emanaldietan. Etxeko logelan hasi ziren kantuak egiten, eta hortik agertokietara egin zuten salto modu azkar batean. Sorturiko lehen kantuekin ‘Zauriren bat bistan’ diskoa kaleratu zuten 2023an, oraingoz taldearen emaitza bakarra den lana. Elektronikatik tiraka ‘bedroom pop’ bezala definitu izan dute egitasmoaren jarduna.