Emakumeak lupaz gara aztertuak. Gizonak baino epaituagoak eta kritikatuagoak gara, bai kalean eta baita interneteko plazan ere.

Emakumeaz gainera arraza beltzekoa bada, bikoitza da pertsona honek sufritzen duen zapalkuntza. Eta tamalez, interneten ere biderkatu egiten dira eraso eta mehatxuak.

‘Cazafantasmas' filmeko Leslie Jones aktoreak berriki salatu du bere azalean sufritutako jazarpena. Erasoek Twitter sare soziala uzteraino eraman dute.

I leave Twitter tonight with tears and a very sad heart.All this cause I did a movie.You can hate the movie but the shit I got today...wrong

— Leslie Jones (@Lesdoggg) 2016(e)ko uztailak 19

Twitterri agur esaten dion mezuan, bizitakoa gehiegizkoa dela deritzo eta jasotako mezuen artean tximua deitzen diotenak edo ezezagunen ipurdien argazkiak ageri direnak daudela salatu du.

Sare sozialetan erasotutakoen artean emakumeak gehiago direla frogatu duten ikerketak egon badaude. Marylandeko Unibertsitateak adibidez, hamar kontu faltsu sortu eta erabiltzaile horiek txatetan jasotako erantzuna aztertu zuen esperimentu batean. Emakume izena zuten kontuek izaera mehatxatzailea zuten edo sexualki esplizituak ziren 100 bat mezu jasotzen zituzten eguneko; gizonek, berriz, 3,7.

‘The Guardian’ egunkariak antzeko ikerketa bat egin du berriki, egunkarian idatzitako albisteek jasotako iruzkinak lagin moduan hartuta. Datuek argi erakutsi dute, kazetari emakumeak direla kritiken top tena irabazten dutenak. Izan ere, hamar kazetari epaituenen artean 8 dira emakumeak.

Arraza eta erlijioa ere aintzat hartu dute azterketa honetan. Hamar kazetari iruzkinduen artean dauden bi gizonak beltzak direla frogatu dute honela. Zortzi emakume horiei dagokienez, berriz, lau beltzak dira, bat musulmana eta beste bat judutarra. Emaitza esanguratsuak guztiak.

Azken hamar urteetan 70 milioi iruzkin idatzi dituzte ‘The Guardian’ egunkariko irakurleek. Iruzkinen %2 a, hau da 1,4 milioi, kudeatzaileek ezabatu dituzte arauak betetzen ez zituztela argudiatuta.