Zientzialari talde batek aurkitu du adipozitoek, batez ere gorputzeko gantz edo ehun adiposoa osatzen duten zelulek, leptina sortzeko erabiltzen duten mekanismoa. Leptina gosea erregulatzen duen hormonarik garrantzitsuenetako bat da, eta ikusi dute, gainera, mekanismo horrek gantz-zelulen erloju biologikoa erregulatzen duela.

Cell Metabolism aldizkariak argitaratu du ikerketa, eta Pere Virgili (IIPSV) Osasun Ikerketa Institutuko Diabetes eta Gaixotasun Metaboliko Elkartuen (Diamet) taldeko, Diabetes eta Gaixotasun Metabolikoen Ziberreko (Ciberdem) eta Tarragonako Joan XXIII Ospitaleko zientzialariek gidatu dute.

1990eko hamarkadan, adipozitoek jariatutako hormona gisa identifikatu zuten leptina, eta horrek paradigma aldatzea ekarri zuen, agerian utzi baitzuen gorputz-gantza organo endokrino aktibotzat hartu behar dela, gorputzaren gosea eta pisua erregulatzen dituena. Ordutik, eta lan zientifiko askok aztertu duten arren nola eragiten duen leptinak nerbio-sistema zentralean (irenstea inhibituz asetasun-sentsazioa sortzean) eta zergatik obesitatea duten pertsonengan mekanismo horrek ez duen behar bezala funtzionatzen, ez zen aurrerapen esanguratsurik egin hormonaren ekoizpen prozesuari buruz.

La Caixa Fundazioaren eta Espainiako Zientzia eta Berrikuntza Ministerioaren Estatuko Ikerketa Agentziaren eskutik milioi bat euro baino gehiago jaso dituen ikerketa hau, ikertzaileen arabera, «mugarri esanguratsua da, ez bakarrik fisiologiaren ikuspegitik, gorputzaren pisua kontrolatzen duten prozesu biologikoen ulermena hobetzen laguntzen duelako, baita obesitatea bezalako gaixotasun metabolikoei aurre egiteko ere».

Sonia Fernández-Veledo IIPSVko ikertzaile eta Diameteko arduradunaren arabera, «dena ondo badabil, odoleko leptina mailak handitzen dira jaten dugunean. Hormona honen ardura da gure burmuinera asetasun-seinalea bidaltzea. Obesitatea duten pertsonengan leptina gehiago sortzen da argalak direnetan baino, baina, aldi berean, leptinaren aurkako erresistentzia izenez ezagutzen den fenomeno bat garatzen da, alegia, organismoak ez diola hormona horri erantzuten».

«Obesitatea duten pertsonek, beraz, asetasunaren mekanismoa aztoratuta dute. Gure ikerketak, adipozitoek leptina sortzeko egiten duten mekanismoa ez ezik, obesitatea duten pertsonen koipe gehiegi zergatik sortzen duten ere erakusten du», gaineratu du. Ikertzaileak azaldu duenez, succinatoak, SUCNR1 hartzailearen bidez hormona gisa jardun dezakeen metabolito energetikoak, zeregin garrantzitsua du prozesu horietan guztietan.

Fernández-Veledoren arabera, aurrerapen zientifiko hau «inflexio-puntua da obesitatearen tratamenduan»

Urte askotan metabolito horri hanturazko papera egotzi izan zaio nagusiki, eta, gainera, obesitatea eta diabetesa bezalako gaixotasunetan disfuntzio metabolikoaren biomarkatzaile gisa identifikatu izan da, baina azken urteotan, Diamet taldeak frogatu du sistema konplexua dela, succinato-mailak ere gora egiten baitu zenbait egoera fisiologikotan, jaten denean adibidez. «Testuinguru horretan uste dugu succinatoak, SUCNR1 hartzailearen bitartez, modu naturalean arautzen duela homeostasi energetikoa, hau da, gure organismoaren barne-funtzioak, irenstearen eta gastu energetikoaren arteko oreka kontrolatzen dutenak», adierazi du Fernández-Veledok.

Ikerketarekin frogatu dutenez, mekanismoetako bat leptina ekoiztea da, eta, beraz, asetasun-sentsazioa sortzea, eta «beste funtzio fisiologiko batzuk dituela aurreratzen du, beste ehun batzuetan jardunez». «Gainera, frogatu genuen succinatoak leptinaren gorabeherak zehazten dituela egunean zehar adipozitoen erloju biologikoa kontrolatuz. Obesitatea duten pertsonen kasuan, mekanismo hori hiperaktibatuta dago, eta horrek, neurri batean, leptina maila altuak azalduko lituzke», zehaztu du ikertzaileak.

Fernández-Veledoren arabera, aurrerapen zientifiko hori «inflexio-puntua da obesitatearen tratamenduan», eta etorkizuneko ikerketei ateak irekitzen dizkie, succinatoaren beste funtzio metaboliko batzuk ikertzeaz gain, mekanismo hori berrezartzea eta asetasun-sentsazioa erregulatzea ahalbidetuko duten terapiak aztertzeko.