La Oreja de Van Gogh taldearen eta Leire Martinez abeslariaren ibilbide profesionalek modu bereizian jarraituko dute hemendik aurrera. Hala iragarri dute astelehen honetan sare sozialen bidez. 17 urte «zoragarrien» ondoren, «taldea bizitzeko modu ezberdinak» bat egin ezinda, batera ez jarraitzea erabaki dutela kontatu dute.
«Inoiz ahaztuko ez ditugun musikaz eta emozioz beteriko 17 urte zoragarriren ondoren, Leireren eta La Oreja de Van Goghen ibilbide profesionalek bide bereiziak jarraituko dituztela iragarri nahi dugu», adierazi du musika taldeak Instagrameko profilean zein X sare sozialean.
— La Oreja de Van Gogh (@laorejadevgogh) October 14, 2024
Taldeak aitortu du erabaki «gogorra eta zaila» izan dela, denbora luzez hausnartu eta elkarrizketa «sakonak» izan ondoren heldu dena. «Ez dugu lortu gure bizitzeko moduak hurbiltzea», azaldu dute.
Hala ere, bihotzean eramango duten etapa «liluragarri» bat amaitzen dela diote. «Munduko lanbiderik onenaz amestutako moduan gozatzeko aukera eman digu», adierazi du taldeak.
2007an ere ahotsik gabe
Ez da taldea bokalistarik gabe geratzen den lehen aldia; 2007an, taldea sortu zenetik, 1996tik, ordura arte ahots nagusia izan zen Amaia Monterok agur esan baitzion taldeari bakarkako ibilbideari ekiteko.
Azken hilabeteetan gero eta indar gehiago hartu dute Montero taldeara itzuli zitekeenaren inguruko zurrumurruek, batez ere, Montero Karol Gren kontzertuan agertu zenetik. Nolanahi ere, ez taldeak ez abeslariak ez dute baieztatu horrelakorik.
Konexioa ezarri dute Lur-1ekin, orbitan jarri duten «lehen euskal satelitearekin»
Gatiburen ‘Azken zoramena’ Gernikan izango da: etxeko giroan, kalean eta ekainaren 7an
Fermin Muguruza, 40 años de lucha y compromiso
Fallece el navarro Ricardo Insausti, referencia mundial en la lucha contra el Alzhéimer
