«Iaz 478 elefante basati hil ziren Sri Lankan, gizakien eta elefanteen arteko gatazkaren ondorioz. Aurten 17 hil dira», esan du eskubideen aldeko aktibista eta Protect Sri Lanka erakundeko kide Palitha Wickramarathnek. Gainera, 150 pertsona inguru hil omen ziren 2023an pakidermoekin izandako topaketen ondorioz, hauek herrixketan sartzen baitira janari bila.

Animalista talde batek manifestazioa egin zuen NBEren Colomboko egoitzaren aurrean. Bertan, nazioarteko erakundeari dei egin zioten laguntza eta baliabideak mobilizatzeko, azken urteotan elefanteen habitat naturalaren galeraren ondorioz areagotzen joan den krisiari aurre egiten laguntzeko.

«Elkarlanerako ahaleginak funtsezkoak dira kontserbazio estrategia bat ezartzeko, habitataren galerari eta zatiketari helduz, gizakien eta faunaren arteko gatazka arinduz eta legez kanpoko hesi elektrikoen aurkako lege berriak ezarriz», azpimarratu dute ekintzaileek NBEri zuzendutako gutun batean.

Sri Lankako elefante basatien populazioa desagertzera arte gutxituko den beldur dira ekintzaileak; izan ere, Nekazaritza Ministerioak 2022an adierazi zuenez, 7.000 elefante daude, eta 2011n 5.879 zenbatu zituzten.

Mehatxupean daude

Azken urteotan gora egin duen arren, Naturarentzako Mundu Funtsak adierazi du Asiako elefanteak mehatxupean daudela Sri Lankan, eta populazioa ia %65 murriztu dela XIX. mendearen hasieratik.

Milaka fusilatu zituzten giza kokalekuak zabaldu ahala; gaur egun, berriz, animaliak hiltzeko arrazoi nagusiak tiroak eta elektrokuzioa dira, batez ere herrialdeko laborantza-barrutietan, non laboreak suntsitzen dituzten izurritetzat hartzen diren.

Ceilango Elektrizitate Batzordeak jakinarazi zuen elektrokuzio bidez 50 elefante basati hil zirela, eta kanpaina bat abiatu berri du informazioa eskatzeko linea elektrikoarekin zuzenean konektatutako legez kanpoko hesiei, pakidermoetarako hilgarriei eta gizakiei buruz.