Finlandia munduko herrialde zoriontsuenen zerrendaren toki gorenean ageri da berriz
Martxoaren 20an ospatzen den Zoriontasunaren Nazioarteko Egunaren harira, herrialde zoriontsuenen mundu mailako sailkapena jasotzen duen txostena argitaratu du NBE Nazio Batuen Erakundeak: Finlandia eta Afganistan kokatzen dira zerrenda horren bi muturretan.
![Finlandiak zazpi urte daramatza lehen postuan.](/media/asset_publics/resources/001/094/588/article_main_landscape/zoriontasuna.jpg)
Finlandia munduko herrialde zoriontsuenen zerrendaren toki gorenean ageri da berriz, zazpigarren aldiz jarraian, eta Afganistan kokatzen da beste muturrean, 143. postuan. Lehen aldiz, zoriontasuna bizitzaren etapa ezberdinetan aztertzen du aurten Nazio Batuen Erakundearen ikerlanak.
Egileen esanetan, zoriontasuna gaztaroarekin lotu ohi da, eta zahartzaroa hain zoriontsua ez den bizitzako etapa gisa irudikatzen da, baina egungo errealitateak uste horiek gezurtatzen ditu.
15 eta 24 urte bitartekoen arteko «bizi-gogobetetze joera global positiboa» koronabirusaren pandemiarekin batera amaitu zen, Gallup, Oxford Wellbeing Research Centre, NBEko Garapen Iraunkorrerako Irtenbideen Sarea eta Zoriontasunaren Mundu Txostenaren Kontseilu Editorialaren (WHR ingelesezko sigletan) arteko lankidetzaren emaitza den ikerketaren arabera.
Zaharrak gazteak baino zoriontsuago
2006-2010az geroztik, 15 eta 24 urte bitarteko pertsonek osatzen duten taldearen zoriontasuna nabarmen jaitsi da Ipar Amerikan, «zaharrak gazteak baino zoriontsuagoak izateraino». Mendebaldeko Europan jaitsiera hori ere nabaritu da, nahiz eta ez hain modu malkartsuan.
Aldiz, adin tarte guztietan zoriontasun maila nabarmen hazi da erdialdeko eta ekialdeko Europan eta, beraz, «gazteak orain ere zoriontsuak dira Europako bi aldeetan».
Sobietar Batasun ohiaren herrialdeetan eta Asia ekialdean ere zoriontasuna handitu egin da adin guztietan, eta Asia hegoaldean eta Ekialde Ertainean eta Afrika iparraldean, aldiz, behera egin du.
Ameriketako Estatu Batuak, hamarkada bat baino gehiago luzatu den joera hautsiz, erori egin dira munduko herrialde zoriontsuenen «top 20» delakotik, batez ere gazteen zoriontasunaren pertzepzioaren beherakadak bultzatuta. 2024ko Zoriontasunaren Munduko Txostenak 23. postuan kokatzen du herrialdea, iazko edizioan 15. postuan zegoen bitartean.
Txostenak, neurri batean, AEBetako posizioen jaitsiera, Alemaniakoa bezala (24. postua), Europako ekialdeko herrialdeen artean zoriontasunaren pertzepzioa handitzeko joerari egozten dio. «Zerrendaren buruan dauden hamar herrialdeek ia berdinak izaten jarraitzen dute covid pandemia baino lehenagotik», nabarmentzen du txostenak.
Zazpi urtez lehen postuan
Finlandiak zazpi urte daramatza lehen postuan, eta ondoren daude Danimarka, Islandia, Suedia, Israel, Herbehereak, Norvegia, Luxenburgo, Suitza eta Australia. Honako hauek dira azkenak: Afganistan (143), Libano (142), Lesotho (141), Sierra Leona (140), Kongoko Errepublika Demokratikoa (139), Zimbabwe (138), Bostwana (137), Malaui (136), Esuatin (135) eta Zambia (134).
Azterlanean ageri diren Latinoamerikako herrialdeen artean, Mexiko (25. postua) da ondoen kokatuta dagoena, eta haren atzetik honako hauek daude: Uruguai (26), El Salvador (33), Txile (38), Panama (39), Guatemala (42), Nikaragua (43), Brasil (44), Argentina (48), Paraguai (57) Honduras (61), Peru (68), Dominikar Errepublika (69), Bolivia (73), Ekuador (74), Kolonbia (78) eta Venezuela (79).
Errusia eta Ukraina, 2022tik gerran daudenak, 72. eta 105. postuetan daude, hurrenez hurren.
Aurten egindako belaunaldien arteko alderaketatik ondoriozta daiteke, batez beste, 1965a baino lehen jaiotako pertsonak –«boomerrak» eta haien aurrekoak– zoriontsuagoak direla 1980aren ondoren jaiotakoak baino –«millennials» eta Z belaunaldia–.
Herrialdeez ari garela, 30 urtetik beherako haur eta gazteak gusturago dituena Lituania da, eta 60 urtetik gorakoentzat Danimarka da munduko herrialderik zoriontsuena.