AP-8 autobidean, Euba auzoaren parean, sarbide berri bat eraikitzeko, Bizkaiko Foru Aldundiak alegazio publikoak aurkezteko epea hasi du, N-634 pilaketaren trafikoa ordainbidera aldatzeko asmoarekin.

AP-8 Peajerik EZ plataformarentzat obra berri hau, eta horrek edukiko duen gastua, (seguru milioi sorta on bat gaindituko duela), ez du justifikaziorik, eta ez da benetako beharrizan baten ondorioz; izan ere, Euba inguruan beste irteera-sarrera bat egiteak, biztanleria-dentsitate oso txikia denean, ez du zentzunik. Tarte horretatik igarotzen diren auto-gidariek, bidesariaren kostu altua ez ordaintzeko erabiltzen dute, eta Usansolora iristea dute helburu, A-8 autobidean sartu eta bertatik zirkulatzeko, ordaindu gabeko gainerako bizkaitarrek bezala.

Obra berri honek berez zementu eta asfalto gehiegi duen landa-eremu batean inpaktu negatibo berri bat sortzeko baino ez du balioko, kilometro bat baino gutxiagoko zabaleran, eta, paraleloan, sei erreiko autobide bat dago, errepide bat (N-634 hirugarren mundukoa), bi trenbide-sare: Euskotrena eta AHT, eta goi-tentsioko azpiegitura-sare bat; hori dena gutxi izango balitz, gure Bizkaiko Foru Aldundiak, gaur egun milaka metroko landa eta balio ekologiko handiko lurrak estali nahi ditu.

Bitxia bada ere, espedienteari erantzuteko (beste askotan bezala), udan alegazio-aldia hasten da, halako bidegabekeriaren aurrean herritarren ezagutza eta eztabaida saihesteko.

Berriro ere, praktikotasunik gabeko proposamen faraoniko honek erakusten duenez, berresten dugu, Unai Rementeria jauna lotuago dagoela eraikitzaileen eta zementu-enpresen interesetara, herrialdeko ekialdean bizi garen bizkaitarren benetako premietara baino, eta adierazi nahi dugu benetako irtenbiderik merkeena eta bidezkoena Amorebieta-Etxano, Durangaldea, Lea-Artibai eta Ermuko igarobidea konpontzeko AP-8 bidesaria kentzea dela.