Sedizio- eta bidegabeko erabiltze-delituak aldatzeko Zigor Kodearen erreformaren tramitazioak organo judizialei ere eragiten die, hala nola Botere Judizialaren Kontseilu Nagusiari eta Konstituzio Auzitegiari. Bi erakunde horietako kideen berritzeak urteak daramatza PPk geldiarazita. Eskuinak bozketa galduko zuela ikusita, PP saiatu zen Auzitegi Konstituzionala kautelaz geldiarazten, eta Vox ere batu zitzaion eskaera horri. Auzitegi Konstituzionalak demanda aztertzea onartu zuen, eta ezohiko eta premiazko bilera bat deitu zuen atzoko. Bilera hori egin zen, baina azkenean deliberamendua atzeratzea erabaki zuen, Kongresuko tramiteek aurrera jarrai zezaten.

Estatuko ezkerretik berehala jo zuten maniobra guztiz antidemokratikotzat, Parlamentuari bere ahalmen subiranoak kentzeko eta herriaren borondatetik sortzen den botere legegilea deslegitimatzeko ahalegintzat. Zalantzarik gabe, azpijokoa erabat antidemokratikoa da; botere judiziala botere legegilearen jardueran sartzea erabat onartezina da demokrazia batean, «sendotua» izan ala ez. Hala ere, PPren eta Auzitegi Konstituzionalaren jokabideagatik sumindutakoek ahaztu egiten dute hori izan dela, hain zuzen, jokamoldea Gasteizko Parlamentuaren kasuan -legebiltzarreko mahaiko hiru kide zigortu zituzten Sozialista Abertzaleak taldea ez desegiteagatik- edo Kataluniako Parlamentuarenean -presidentea desobedientziagatik zigortu zuten, U1eko erreferendumari buruzko eztabaidak baimentzeagatik-. Orduan ezer gutxi esan zuten botere banaketaren defendatzaile espainiarrek. Hain zuzen ere, independentismoaren aurkako borrokan erabaki zuen estatuak organo judizialetara jotzea aldarrikapen legitimo eta demokratikoak isilarazteko. Eta behin aurrekaria ezarrita, inork ez daki noraino irits daitekeen.

Orain zalantzak argitu dira. Estatu sakona statu quoa defendatzeko behar den lekuraino iristeko prest agertu da. Eta beharrezkoa bada, agerian utziko du Espainiako demokraziaren izaera formal hutsa. Erreformatu ezin den estatu baten aurrean, independentzia etorkizuneko aukera bakar gisa gero eta argiago agertzen da estatuko herrientzat.