Espainiaren presioek Mexikoko bozketa blokeatzea lortu dute
«Pilotaren mundua batuta izatea lortzeko» 12 ordezkarik babestu dute Nazioarteko Federazioak batzarreko gai zerrendako puntu bakarra, estatutuak aldatu eta Euskadiko Federazioa onartu edo ez, bertan behera uzteko aurkeztutako proposamena.
![Biarritzeko Munduko Txapelketaren bezperan Durangon egindako elkarretaratzea.](/media/asset_publics/resources/001/021/671/article_main_landscape/0730_kir_pilota.jpg)
Euskadiko Pilota Federazioak itxaron egin beharko du Nazioarteko Federazioko kidetzat onartzen duten edo ez jakiteko, proposamenak federazio desberdinen artean sortutako liskarrak ekidite aldera, atzo Mexikon egitekoa zen bozketa bertan behera utzi baitzuten, azken egunetan bereziki Espainiako Federazioak han egindako presioen ondoren. Estatutuak aldatu eta Euskadiko Federazioa kide bezala onartu edo ez zen atzorako deitutako ezohiko batzarreko puntu bakarra, baina Nazioarteko Federazioak puntu hau gai zerrendatik ateratzea proposatu zuen, hau da, batzarra edukiz hustea, eta aho batez, bertaratutako 12 federazioen babesarekin, proposamenak aurrera egin zuen. Zabaldutako dokumentu batean, erabakia «pilota mundua batuta mantentzeagatik» hartzen dela nabarmentzen da.
Antza denez, atzoko batzar orokorraren aurretik Mexikon federazio desberdinen artean izandako bileretan desadostasun handiak izan dira erabakiaren inguruan. Jakinekoa da Xabier Cazaubon baionarrak, Nazioarteko Federazioko presidenteak, bere idazkari kargutik kendu zuela Julian Garcia Angulo, Espainiakoaren presidentea, bere aurka eta bozketaren aurka sare sozialetan egindako presioagatik. Beraz, adostasun zabalago baten esperoan, bozketa epe berririk gabe atzeratzea erabaki zuten.
ENBIL, ZUHUR
Erabakiak epel samar utzi zituen Euskadiko Pilota Federazioko ordezkariak, eta adostasun zabal hori lortzeko bidean jarraituko dutela berretsi zuten. «Enaitz Olaeta dago han, eta bere bitartez jakin dugu bozketako puntua gai zerrendatik atera dutela eta azkenean ez dela bozkatu. Badirudi egun hauetan bilduta egon diren federazioen artean ez dagoela adostasun nahikorik eta pilotaren hobe beharrez erabaki da hau gai ordenatik ateratzea eta berriro adostasun horren bila lanean jarraitzea. Prozesuak bizirik segitzen du, guk lanean jarraituko dugu, eta espero dugu denbora gutxian adostasun hori lotu eta gure helburua lortzea», azaldu zuen Gotzon Enbilek, Euskadiko Federazioko presidenteak.
Esan bezala, balorazio bat egiterakoan ez hotz ez bero agertu zen zumaiarra. «Balorazioa? Segun nola hartzen duzun, baiezkoa irten izan balitz, ba, gaurkoa albiste txarra litzateke, baina ezezkoak irten balu agian okerragoa izango zen -bi urtetan ezingo litzateke beste bozketa bat egin-, desadostasunak baitaude, eta pilota munduarentzat ez zen ona izango desadostasun horiek egotea. Orduan, nik uste dut han egon direnek dakitela zein desadostasun izan diren. Hobe da lanean jarraitzea eta hau denon edo gehiengo zabal baten adostasunarekin egitea. Gerora ere pilotarentzat hoberako izango da, eta lanean segituko dugu, ea ahalik azkarren gure helburua lortzen dugun».
Puntista ohiak ez zuen alde edo kontra dituzten federazioen inguruko detaile askorik eman nahi izan. «Ez dakigu dena, gu bilera horietan ez baikara egon, ez gara Nazioarteko Federazioko partaideak eta ez dugu egoterik. Baina gutxi gorabehera badakigu estatutuen aldaketaren proposamena zein naziok egin duten: Frantziak, Mexikok eta Argentinak; eta suposatzen dugu aldekoak izango direla. Gero sare sozialetan-eta ikusi izan dugu federazio batzuek zer partekatu duten -Espainiak eta Kubak bereziki-, kontrako bozka eskatzen; eta suposatzen dugu federazio horiek kontra egongo zirela. Azkenean gehiengo handi baten adostasuna behar da, gero liskar handirik ez egoteko. Horretarako lanean jarraituko dugu», azaldu zuen.
Dena den, «atzo baino hobeto» gaudela uste du zumaiarrak.
![0902_eg_irunea](/media/asset_publics/resources/001/151/714/article_thumb_horizontal/0902_eg_irunea.jpg)
Pantailak ala liburuak? Gerra utzi eta zientziak dioenari doitu
![0910_eh_erko](/media/asset_publics/resources/001/154/730/article_thumb_horizontal/0910_EH_ERKO.jpg)
Zupiria desvela que Erkoreka mintió al Parlamento en la defensa de un agente
![0911_eg_jonurzelai2](/media/asset_publics/resources/001/154/927/article_thumb_horizontal/0911_eg_JonUrzelai2.jpg)
La muerte de Jon Urzelai, un relato trampeado
![0911_eg_ortuzar](/media/asset_publics/resources/001/154/930/article_thumb_horizontal/0911_EG_ORTUZAR.jpg)
El poco productivo pasado y el incierto futuro de Ortuzar liderando este proceso
![0912_eh_palacete](/media/asset_publics/resources/001/155/190/article_thumb_horizontal/0912_eh_PALACETE.jpg)