Herenegun emakumeen eskubideen aldeko borrokak garaipen garrantzitsua lortu zuen Mexikon. Nazioko Justizia Gorte Gorenak zigor kode federalaren lau artikulu Konstituzioaren kontrakotzat jo zituen, eta, ondorioz, abortu-delitua behin betiko ezabatu zen legeriatik. Gainera, Auzitegi Gorenak, bere ebazpenean, osasun publiko federala behartzen du haurdunaldia borondatez etetea eskatzen duten emakumeei behar duten arreta doan ematera.

Prozesu luzea izan da 2007an barruti federalak haurdunaldia legez etetea onartu zuenetik. Orduan egitura instituzionala ere onartu zuen, abortua modu seguruan eta zientifikoan egin zedin, laguntza psikologikoarekin, eta emakumeen intimitatea eta autonomia errespetatuz. Gertaera hartatik aurrera, eskuina aurrerabide hori murrizten saiatu zen gobernatzen zuen estatuetan, emakumeak eta osasun-langileak kriminalizatzen zituzten eta praktika ezinezko bihurtzen zuten trabak ezartzen zituzten legeekin. Kontzientzia-askatasuna ere eskatu zuten eskuineko alderdiek, medikuek abortuari uko egin ziezaioten. Haien maniobrek ez zuten haurdunaldiaren etendura murriztea erdietsi; emakumeen bizitza eta osasuna arriskuan jartzen zuen merkatu klandestino bat sortzea baino ez zuten lortu, batez ere baliabide gutxien zituzten emakumeena. Mexikoko Auzitegi Gorenaren ebazpenak maniobra horien guztien amaiera dakar, eta emakumeak bere gorputzari buruz erabakitzeko duen eskubidea aitortzen du.

Borroka feministaren garaipen horrekin batera, Claudia Sheinbaum Pardo izendatu du Morena alderdiak presidente izateko hauteskundeetarako hautagai. Sheinbaumek irabazi du barne prozesuan, eta oposizioko Frente Amplioko Xóchitl Galvez hautagaiaren aurka lehiatuko da. Beraz, litekeena da Mexikoko hurrengo presidentea emakumea izatea. Pixkanaka, erresistentzia asko gainditu ondoren, emakumeen eskubideak zabaltzen ari dira. Aldi berean, kristalezko sabai asko pitzatzen ari dira eta bizitza sozialaren eta politikoaren esparru guztietan emakumeen presentzia hazten ari da. Feminismoaren bultzada geldiezina da.