Gaur abiatuko den eta ekainaren 7ra arte Erlaitzeko errepidean egingo den behin-behineko itxialdia betiko izan daitekeela ohartarazi zuen atzo Euskal Erlaitzeko Herritarren Elkarteak. Donibane Lohizunetik Hendaiaraino kostaldetik doa bide hau.

Talde honek nabarmendu zuenez, errepidearen ixteak arazo ugari ekarriko dizkie inguruko biztanleei. Hori dela eta, Biriatu, Hendaia, Urruña, Ziburu eta Donibane Lohizuneko udalei «gogoeta egiteko, kanpo eraginik ez onartzeko, arrazoira itzultzeko eta gure bide ederra konpontzeko posizio argia hartzeko» deia egin zieten.

Antzeko jarrera eskatu diete Lapurdiko kostaldeko eragileei eta Vincent Bru diputatuari.

Kontuak horrela, kostaldean ardura duten administrazioei ingurua hau ekologia ekonomiarekin, bertako biztanleekin, nekazaritzarekin eta «guztiontzako turismoarekin» uztartzeko eredua izan daitekeela adierazi zieten. Honen aurrean, inguruko biztanleek behin-behineko itxieraren benetako helburuen berririk ez dutela salatu zuten. Higadurari buruzko kanpainak egiten diren bitartean, agintariek itxieran egiten diren ikerketek errepidearen etorkizuna erabakiko dutela esaten dutela nabarmendu zuten. «Hala ere, errepidearen ixtea indarrean dago hamar urtez, hau da, 2034 arte», adierazi zuten.

Hori dela eta, errepidea itxita dagoen bitartean egiten diren ikerketen emaitzak publiko egitea eskatu zuten.