Bilbao Kirolak-eko kiroldegiek ezohiko uda bizi dute. Uztailaren erdian gaude, eta milaka erabiltzaileren etsipenerako, Artxanda, El Fango-Rekalde eta Txurdinagako kanpoko igerilekuak itxita daude oraindik. Arrazoia? Azpikontratatutako enpresetako langileen «hitzarmen duin» baten aldeko greba. ELAk salatu duenez, enpresek ez dute negoziatu nahi eta Udalak gatazkari muzin egiten dio. Gainera, Juan Mari Aburto alkatea sindikatuaren eta grebaren beraren aurka oldartu da.

Izan ere, Emtesport enpresarako (begiraleak, sorosleak) eta Ute Giroa Ansareo enpresarako (mantentze lanetako langileak) azpikontratatutako Bilboko kiroldegietako langileek 17 hilabete baino gehiago daramatzate lan baldintza duinak lortzeko mobilizazioekin. Ekainean LABek, CCOOk eta UGTk hitzarmen sektoriala sinatu zuten, baina ELArentzat ez zen nahikoa izan eta grebarekin jarraitu du.

Besteak beste, langileek «kontratazioetan partzialtasun handia; erosteko ahalmena bermatzen ez duten soldata txikiak; kontziliazioa eragozten duten lanaldi zatituak eta ordutegi aldaketak...» salatzen dituzte.

Orain arte, ELA sindikatuak salatu duenez, ez enpresak ezta Udala ere ez dira negoziatzearen alde agertu, eta, beraz, «langileek borrokan jarraituko dute zerbitzuaren kalitatea hobetuko duten baldintza duinak lortu arte».

Lan borroka hau gehiago ikusarazteko asmoz, atzo goizean kalera atera zuten igerilekua, Bilboko Kale Nagusira, Bizkaiko Foru Aldundiaren aurrean, protesta gisa. Bertan, aerobik eta igeriketa klaseak simulatu zituzten denbora batez grebalariek.

Duela astebete, Bilboko alkate Juan Mari Aburto haserre agertu zen greba honekin, eta ELAren jarreraren aurka egin zuen. Gainera, gutxieneko zerbitzuak ezartzeko eskatu zion Lakuako Gobernuko Lan Sailari, kiroldegiak, «aisialdirako lekua izateaz gain, osasunaren sustapenarekin zerikusia» dutela argudiatuta.

Marije Fernandez ELAko ordezkariak atzoko protestan adierazi zuenez, eskaera hori «pentsaezina» da. Halaber, Aburtoren Gobernuaren jarrera kritikatu zuen, adieraziz gatazka konpontzen saiatzeko grebalariekin oraindik ez dela harremanetan jarri .

Kanpoko igerilekuez gain, barruko gainerako igerilekuak (Deustu, Zorrotza, San Mames, Atxuri, Txurdinaga eta Errekalde) eta beste jarduera batzuk ere itxita daude, mantentze-lanetako langileen grebaren ondorioz.

Bilboko kiroldegietan ez ezik, Barakaldon, Leioan eta Sopelan ere greba-deialdiari eutsi dio ELAk, zentro horietan hitzarmen propioa lortzeko asmoz. Bermeon, Derion eta Elorrion lortutako akordioei dagokienez, ELAko ordezkari batek adierazi zuen udalerri horietako kiroldegien egoerak «ezin direla alderatu».