Frantzisko aita santua Erromako Gemelli Poliklinikatik atera zen atzo, bertan, arnas infekzio larri baten ondorioz, 38 egun eman ondoren. Alta jaso aurretik, ospitaleko leiho batetik eskerrak eman zizkion zain zuen jendetzari.

Dena den, atzo ere, eta seigarren igandez jarraian, idatziz zabaldu zen Angeluseko testua. Bertan, «atsekabetuta» agertu zen Israelek Gazaren aurka egindako bonbardaketengatik, eta «behin betiko su-etena» eskatu zuen.

ZUZENEAN, TELEBISTAN

Ospitaleko irteera ikusgarria izan zen oso. Lehenengo, Vatikanoko bizilekurantz hartu beharrean, ezustean, aita santuak bere joan-etorrietarako erabili ohi duen auto txikia buru zuen taldea bere bidetik desbideratu zuelako eta Santa Maria La Mayor elizara joan zelako. Eliza horrek “Salus Populi Romani” ikonoa gordetzen du, Frantziskoren oso gustukoa.

RAIk, Italiako telebista publikoak, zuzenean eman zuen Erroma erdiguneko kaleetan zehar egin zuten ibilbidea: oinezko ugari zegoen geldirik espaloietan, txaloka; bitartean, Frantziskok, oxigenoa jasotzeko sudur-kanulak soinean, autoaren barrutik jendetza agurtu zuen. Hori izan zen atzoko irudi ikusgarria.

Orain fase berri bat zabalduko da eliza katolikoan; izan ere, Frantziskok, fededunen gertutasunaren hain zalea izanik, bere ohiturak aldatu beharko ditu. Halere, Victor Manuel Fernandez kardinal argentinarrak ukatu egin zuen atzo aita santuak erretiroa hartzea pentsatzen duenik, baina gutxienez bi hilabeteko «susperraldi babestua» egin beharko du.