‘Loa eta Laia’ euskarazko marrazkien pertsonaien azken abenturan, «ingurumena, natura eta bertako baso biziak» dira protagonista nagusiak. Izan ere, musika ardatz duten marrazki bizidunek inguruan dagoen naturari erreparatzen diote laugarren kapitulu horretan, bertoko zuhaitzak dituzten basoak eta, orokorrean, ekosisteman eta paisaiak babesteko beharra plazaratuz.

Egitasmo digitalaren sortzaileek zehaztu dutenez, zuhaitz eta landare ezberdinak ezagutzen laguntzen du azken atal honek, inguruan dauden altxorrak ezagutzea baino ez baitago horiek zaintzen hasteko.

Ekosistema horien, jasangarritasunaren eta osasunaren artean dauden loturak erakustea da mezu nagusia, azaldu dutenaren arabera.

Materiala

Etxeko txikiekin batera jolas eta ariketa ezberdinak lantzeko materiala ere aurki dezakete ikastetxeek eta familiek marrazkiekin batera. «Dagoeneko proiektua pixkanaka handitzen ari da eta hezkuntza zentro ezberdinen eskaerari erantzunez material gehigarria lantzen hasi gara. Webgunean deskargatzeko moduko koloreztatzeko irudi ezberdinak eskegi ditugu», zehaztu dute.

‘Gau beltza’, ‘Euskararen eguna’, ‘Oparirik politena’ eta ‘Zaindu basoa’ dira egitasmo ditigitalak sortutako azken lau kapituluak.