1992ko Udako Olinpiar Jokoak 1992ko uztailaren 25ean hasi ziren Bartzelonako Lluis Companys Olinpiar Estadioan. Bartzelonakoak historiako Joko Olinpiko hoberentzat hartu ziren ordura arte.

Olinpiar Jokoek aldaketa sakona eragin zuten Bartzelonako hirian eta Kataluniako gizartean. Inaugurazio-ekitaldia Montjuiceko estadio olinpiko birmoldatuan izan zen, gerora Lluis Companys izena eman zitzaiona. 1929ko Bartzelonako Nazioarteko Erakusketan inauguratu zen, baina erabat berritu zuten, Bartzelonako 92ko Olinpiar Jokoak hartzeko, eta fatxada bakarrik gorde zen.

1992ko uztailaren 25ean ospatu zen Olinpiar Jokoen inaugurazio ekitaldia. Hasieran La Fura dels Baus taldeak Herkulesen eszena mitologikoa irudikatu zuen, Europa eta Afrikako kontinenteak bereiziz, Mediterraneo itsasoa eta Bartzelonako hiriaren etorkizuneko sorrera sortuz. Ondoren, Victoria de Angels, Jaume Aragall, Teresa Berganza, Montserrat Caballe, Josep Carreras, Placido Domingo, Alfredo Kraus eta Joan Pons abeslariek eta Carles Santos edo Ryuichi Sakamoto musikariek parte hartu zuten; eta Kataluniako kulturako zenbait elementu agertu ziren, hala nola sardana dantza eta ‘castells’ giza dorreak.

Antonio Rebollo arkulariak pebetero olinpikoa piztu zuen, su olinpikoarekin sutan zegoen gezi bat jaurtiz, zeremoniaren unerik gogoangarriena. Kalkulatzen da mundu osoan 2.000 milioi pertsona inguruk jarraitu zutela telebistaz irekiera ekitaldia.

Ondoren, Pasqual Maragall Bartzelonako alkateak Jugoslavian bakearen aldeko zenbait esaldi eman zituen bere hitzaldian. Maragallek 1936ko Herri Olinpiada aipatu zuen bere diskurtsoan, 1936ko Gerraren ondorioz bertan behera gelditu zena.

Abuztuaren 9an Montjuiceko Estadio Olinpikoan egindako itxiera ekitaldian, Joan Antoni Samaranch Nazioarteko Batzorde Olinpikoko lehendakariak adierazi zuen Bartzelonakoak izan zirela historiako Joko Olinpiko onenak. Nazioarteko komunikabide eta atleta guztiek berretsi zuten baieztapen hori.

1992ko Bartzelonako Olinpiar Jokoetan erabili ziren Vall d'Hebroneko frontoiak, haiek berritu eta egokituz. Orduan izan zen euskal pilota Joko Olinpiko batzuetan azkeneko aldiz, erakustaldirako kirol moduan katalogatuta, eta Ruben Belokik irabazi zuen urrezko domina.