XIX. mendearen bigarren erdian Donostian hiri aldaketa handiak izan ziren. 1854an probintziako hiriburu izendatu zuten. 1863an eta hainbat urtez gestioak egin ondoren, Donostiak gerra plaza izateari utzi zion eta haren harresiak eraits zitezkeen. Hiri berriaren kontzeptu urbanoak bi urteko eztabaidetara eraman zuen Udala. Alde batetik, bulebaristak zeuden, turismoari emandako hiriari bide emango zioten bulebar handi bat, parkeak eta pasealekuak sortzearen alde zeudenak, eta bestetik antibulebaristak, portu garrantzitsu bat izango zuen merkataritza-hiri baten alde egiten zutenak. 1865eko maiatzean egindako osoko bilkura batean bulebaristen aukera nagusitu zen. Artikulua ilustratzen duen irudian, harresiak eraitsi ondoren eraiki zen lehen eraikina ageri da; hiri berriaren eraikuntza hasia zen. Eraikin hau Bulebar eta Garibai kaleen arteko izkinan zegoen, eta bertan egon zen ia 80 urtez Cafe de la Marina kafetegia.