Ohar bidez Gernika-Lumoko Udalak jakinarazi duenez, epaimahaiak erabaki du Juan Manuel Santosek, Rodrigo Londoño Echeverrik eta Gervasio Sanchez fotokazetariak jasoko dutela aurten bakearen eta berradiskidetzearen aldeko Gernika Saria.
Lehen saria Juan Manuel Santos presidente kolonbiarrak eta FARCeko buru Rodrigo Londoño Echeverrik jasoko dute, 52 urtetako gatazka armatuari adostutako amaiera emateko eginiko ahalegina aitortzeko.
Bigarren saria Gervasio Sanchez fotokazetariak jasoko du, urte luzetako ibilbidearengatik. 25 urtetan, gerra desberdinetan argazkilaritza indarkeria salatzeko erabili izan duela azpimarratu du epaimahaiak.
Sari banaketa apirilaren 26an egingo dute Gernika-Lumon, bonbardaketaren 80. urtemugaren harira egingo dituzten ekitaldien baitan.