2015ean erregistratutako bisitari kopuruarekin alderatuz, %7,9 igo da aurten turista kopurua Bilbon. Zabaldutako datuen arabera, bisitari gehienak Estatu espainiarretik -515.449 hain zuzen ere−, etorri dira. Euskal Autonomi Erkidegotik eta Nafarroatik iritsitako bisitariak ere jatorri eta kopuru honen barruan sartu ditu Bilboko Turismo bulegoak.

Gainontzeko turisten artetik −362.398− % 17,5 Estatu frantsesetik etorri dira, hauen artean kokatuko lirateke Ipar Euskal Herritik etorritako bisitariak Bilboko Turismo bulegoak emandako datuetan. % 11,1 berriz, Britainia Handitik, eta horren ostean Alemaniatik −%10,6−, Estatu Batuetatik −% 8,1 , Italiatik −% 7,6− eta Herbeheretatik −% 5,2−.

Aldi berean, ostatuetan igarotako gauei dagokienez, inoiz baino kopururik altuena jaso dela azpimarratu dute, 1.689.806 hain zuzen ere; 2015ean baino % 8,3 gehiago.

Nazioarteko mapa turistikoan hiria erreferente bilakatu dela nabarmendu dute Udaletik.