‘Lan istripu gehiagorik ez! Prekarietatea hiltzailea’ zioen pankarta baten atzean bilduta egin dute elkarretaratzea Azpeitian ELA, LAB, ESK, STEILAS, HIRU eta EHNE sindikatuek. Honekin batera, Glual Energy zein Glual Hidraulicseko beharginek bi orduko lanuztea egin dute, eta Glual Taldeko Azpeitiko Burni enpresan, aldiz, ordubetekoa.
Iragan ostiralean lan istripuz zendu zen 50 urteko langilearen familia, lagun eta lankideei elkartasuna adierazteaz gain, sindikatuek gogoratu dute 2017. urte honetan dagoeneko 42 pertsona hil direla lan istripuz Euskal Herrian.
Datu hauek «ez dira zoriaren ondorio», mahai gainean prekarietatearen «egiturazko arazoa» jarri duten sindikatuen esanetan. «Etenik gabeko irabaziak bilatzen dituztenek prekarietate egoera latzak ezarri dituzte langileen bizkar: lanaldi luzeak, presioak, baldintzetan etengabeko murrizketak, mehatxuak eta kaleratzeak».
«Langileak lanean hiltzea kapitalismoaren adierazpen gordinenetako bat da», ohartarazi dute, heriotz horiek «izeberg-aren punta» direla nabarmenduz.
Horrexegatik, nahikoa dela argi esan eta «irabaziak lehenesteari» utzita, enpresariek «lan segurtasunean, lan baldintza egokiak bermatzeari» ekin behar diotela adierazi dute sindikatuek.
«Bizi dugun egoera jasangaitz hau irauli beharra dago», aldarrikatu dute.
Un hombre mata a una joven de 20 años con un arma blanca en una bajera de Arrotxapea, en Iruñea
Antolín, proveedora de Volkswagen, cerrará su planta de Arazuri-Orkoien, con 108 empleados
Afiliados del PNV presentan a David Salinas-Armendariz como alternativa para el BBB
«Uste dut gaitasuna erakutsi dugula kantxa osoan jokatzeko»
