Hilik aurkitu dute larunbat arratsaldetik La Mongien desagertua zegoen eskiatzaile azpeitiarra, uztarria.eus agerkari digitalaren arabera.

Atzo arratsaldean eman zuten 24 urteko azpeitiarraren desagerpenaren abisua haren lagunek, eta segituan hasi ziren haren arrastoaren bila larrialdi zerbitzuak. Helikopteroz aritu ziren azpeitiarraren bila, baina 20.00ak aldera, ordurako ilundu zuela eta, bertan behera utzi behar izan zituzten erreskate lanak.

Igande goiz honetan berrartu dute bilaketa, eta hilik aurkitu dute 24 urteko azpeitiar eskiatzailea.

Eneko Etxeberria Azpeitiko alkateak Twitter bidez baieztatu du gaztearen heriotza.

Tristea, oso modu tristea urtea bukatzeko. Pena eta saminez bukatuko dugu urtea, mendian azpeitiar bat hil zen atzo, la Mongien. Gaur aurkitu dute gorputza.

— eneko etxeberria (@eetxeberria) December 31, 2017

Efe albiste agentziaren arabera, pistaz kanpo zebilela harkaitz batzuen aurka jo ostean hil zen gaztea, Iñigo Larrañaga. Kolpearen ondorioz hainbat zerbikal hautsi zituen antza. Gaztearen familia ezbeharra jazo den lekuen aurkitzen da dagoeneko.