Gabonen amaierak izotza eta elurra ekarri du gure bideetara eta anabasa sortu da errepideetan. Asteburua izanik zientoka senide eta lagun bidean ziren Estatu espainol eta frantsesean barna sakabanatuta dauden euskal presoekin bisita partekatzeko.

Ohikoak dituzten bidaia luzeak, are gehiago luzatu eta korapilatu ditu denboraleak eta badira errepidean ez aurrera eta ez atzera geratu direnak ere. Sare sozialetan ikusi dugu senide horien ezintasuna eta baita haiek gogoan dispertsioa salatu dutenak ere.

’Berria’ egunkariko zuzendari orde Iñaki Petxarromanek bikotekidea Alacanteko espetxean duen lagun batek asteburuan bizitakoa jaso du bere Twitter kontuan. Bisitatik bueltan errepidean ez aurrera eta ez atzera geratu zen, autoan hiru eta zortzi urteko seme-alabak ere bazeudela.

Bikotekidea Alacanten bisitatu ostean elurrak harrapatuta geratu zen lagun bat atzo etxera itzuli ezinda, hiru eta zortzi urteko bi seme-alabekin. Denera ohitutzen gara, baina egoera hau jasanezina da. #STOPdispersion

— Iñaki Petxarroman (@petxarroman) 2018(e)ko urtarrilak 7

Petxarromanen mezuak, asteburuan senideek bizitakoaren ispilu bihurtuta, oihartzuna izan du sarean. Twitterren 174 aldiz izan da elkarbanatua eta Facebooken ere bere bidea egin du.

Honakoa baina ez da errepide espainoletatik iritsi zaigun mezu bakarra. Asteburuko bidaia «gogorra eta arriskutsua» izanik, Mirentxineko gidariei euren esker ona eskaini nahi izan zien Jon Kepa Preciadok.

Ugari dira euren bidaia luzeen berri sareetan emateko ohitura duten senideak. Valladolideko kartzelarako bidea goizeko ordu txikietan hartu zuen lizartzar honek.

Lizartza 04:22
Astebururo moduan espetxe politika hiltzaile honen hatzaparretara kondenatuak gara...#STOPdispertsioari #PrestGaude pic.twitter.com/NuNcxiMljK

— Haimar (@ekilizar) 2018(e)ko urtarrilak 7

Eta honek, aldiz, Andaluziaraino joan behar izan zuen bere anaiarekin 40 minutu partekatzeko.

@EtxeratElkartea Beste asteburu bat errepidean anaiarekin minutu batzuez egon ahal izatekp. ASKI DA!!! #DispertsiorikEz #kalera #orainpresoak pic.twitter.com/jfnNMpdT1H

— lameri (@trinititti) 2018(e)ko urtarrilak 5

Asko izan ziren elur iragarpenak ikusita errepidean izango ziren senideekin gogoratu eta dispertsio politika salatu zutenak. Gehientsuenek gainera, datorren larunbatean euskal presoen eskubideen alde Bilbo zeharkatuko duen manifestaldirako deialdia egin zuten.

Arazoa ez da elurra. Arazoa dispertsio politika da. Elurrak ez dauka arduradunik, dispertsioak ordea bai. Elurra maite dugu, eta dispertsioa gorroto. #dispertsiorikEZ #ElurraAriDu #etxera #U13Bilbo

— Napar Riot (@napar_riot) 2018(e)ko urtarrilak 7

Gaur senideak ikusi ahal izateko ehunka kilometro errepidean pasa behar izan dituzte herritar askok, eguraldi gogorrei aurre eginez eta bizia arriskuan jarriz. Egoera honekin behingoz amaitzeko #U13Bilbo kaleak bete behar ditugu. #PrestGaude

— Sare (@sare_herritarra) 2018(e)ko urtarrilak 6

Animo errepidean geldituta zaudeten senide guztiei! #SakabanaketaSTOP

— Estitxu Ugarte (@estitxuugarte) 2018(e)ko urtarrilak 6