Sute bat piztu da Seaskak Kanboko herrian dituen bulegoetan. 08:37ean iritsi da abisua. Langile guztiak ongi atera dituzte eta suhiltzaileak lanean ari dira, sua itzali nahian eta gertatutko argitu asmoz.

Beheko solairuko gela batean piztu da sutea, materiala gordetzen zuten gelan, hain zuzen. Hur Gorostiaga Seaskako zuzendariak EiTB taldeari azaldu dionez, kalte materialak «handiak» dira. Bertan dituzte, besteak beste, Herri Urratseko jantziak, biltegia eta sukaldea. Oraingoz, nola sortu den ez badute argitu ere, Gorostiagaren esanetan, lehen zantzuen arabera, zirkuitulabur batek eragin du sutea.

Hazparne, Kanbo, Angelu eta Ahurtiko 25 suhiltzaile lanean ibili dira ordu batez sua itzaltzeko. Sutea «aski bortitza» izan dela azaldu du horietariko batek.

Hazparne, Kanbo, Angelu eta Ahurtiko 25 suhiltzaile lanean ari dira, sutea kontrolpean dutela diote https://t.co/yfgRxwyN2D pic.twitter.com/XFHv4FtYEq

— kazeta.eus (@kazetaeus) January 10, 2018

Sutearen ondorioz, arratsalderako zituzten formazio eskolak bertan behera utzi behar izandituzte, eta momentuz ez dute zehazterik noiz sartu ahal izango diren eraikinaren barrualdera, kalteak zehazteko. Egoitzatik gertu Xalbador eskola aurkitzen da, baina normaltasunez ari dira han eskolak ematen.