Bizkaiko Auzitegian astean hasiko da Leire Rodriguez bere emazte ohia hiltzea leporatzen dioten gizonaren aurkako epaiketa. Gaur osatu da herri epaimahaia –bost gizon eta lau emakume aukeratu dituzte, eta haien ordezkoak–, eta astelehenean izango da epaiketaren lehen eguna. Akusatuak egun hrretan bertan deklaratzea espero da, EAEko Justizia Auzitegi Nagusiak azaldu duenez.

Fiskaltzak 23 urteko espetxe zigorra eskatzen du gizonarentzat, hilketa egotzita, eta herri akusazioak –Clara Campoamor elkarteak–, berriz, 25 urteko zigorra.

Leire Rodriguez arrigorriagarra, 34 urtekoa eta bi seme-alabaren ama, 2015eko abuztuaren 8ko goizaldean aurkitu zuten Bilboko Abusu auzoan, errepide bazter batean, hilda. Auto batek harrapatu zuen zantzuak zituen, eta ikerketa abiatu zuten.

Egun batzuk geroago, bere senar ohiak –dibortziatzeko tramiteak egiten ari ziren– trenbidera bota zuen bere burua, ustez bere buruaz beste egin nahian. Ordu batzuk lehenago Ertzaintzaren komisaldegian hitzordua zuen, baina ez zen agertu.

Ertzaintzaren arabera, indarkeria matxista kasua izan zen heriotza hura. Ikerketak jaso zuenez, senarrak hil zuen emazte ohia, buruan eman zion kolpe batez. Ondoren, bere autoarekin harrapatu zuen behin eta berriro, istripuaren itxura izan zezan. 

Epaiketa apirilaren 18ra arte luzatuko da.