Komunikabideetara bidalitako ohar batean LAB sindikatuak azaltzen duenez, Bilboko udal kiroldegietako zerbitzua kudeatzen duen enpresa azpikontratatuta dago eta esleipena duen enpresak, GUEDAN Servicios Deportivos S.A.-k, «kostuak murriztea du helburu» Udalak eta honek eraginak ditu udarako irekitako igerilekuetan.

LAB sindikatuak dioenez, igerilekuetara laguntzailerik gabe sartzeko gutxieneko adina murriztu egin da, 14 urtetatik 11ra, hain zuzen ere, baina nabarmen jaitsi da igerileku irekiak zaintzera zuzendutako sorosle kopurua.

«Aurtengo udara arte, gomendioei jarraituz, igerilekuetan 3 sorosle egon dira normalean, jendetza aurreikusten zen kasuetan 4. batek lagunduta. Aurtengo uda bestelakoa izango da, bi sorosle egongo dira soilik, eta hiru jendetza aurreikusten den egunetan», salatzen dute oharrean.

LAB sindikatuak dioenez, «S.O.S.eko langileek, euren esperientziatik, euren kezkak adierazteko beharrean daude, ezinezkoa baita aurreikuspenik egitea. Egun oso beroek eta oso jendetsuek ez baitute sarritan bat egiten. Horrez gain, erantzukizun falta larria iruditzen zaigu igerilekuetara laguntzaile nagusi barik sartzeko ezarritako gutxieneko adina».

«Honen guztiagatik, uda honetan Bilboko udal igerileku irekiak erabiltzen dituzten hiritarrei arreta handia jar dezaten ohartarazteko beharrean gaude. Arazoak egotekotan, Udala ez baita erantzule egingo», salatzen dute oharrean.