Iazko abenduaren 5ean hasi ziren grebak eta mobilizazioak Estatu frantsesean eta ordutik ez dute etenik izan. Ipar Euskal Herrian 53. greba eguna dute Hendaia eta Baionako trenbideetako langileek. Gehiengo sindikalak eta mugimendu anitzek deituta, zortzigarren astez jarraian mobilizazio bateratua eginen dute arratsaldean Baionan. Gauzak honela, mugimendu eta sindikatu desberdinek deituta ekimen anitz ari dira egiten egunotan Lapurdi, Baxe Nafarroa eta Xiberoan, Naiz atariak azaldu duen bezala.

Irakaskuntzan, osasun arloan, epaitegietan edo garraioan, erraterako, greba, lan uzte eta ekimen ugari egin dituzte protestak hasi zirenetik. Horrela, guztiek bat egin zuten urtarrilaren 24an, pentsioen erreformaren lege proiektua ministroen kontseiluan onartu zen egunean. Egun hartan bertan erreforma bertan behera utzi arte mobilizazioek jarraituko zutela iragarri zuten sindikatuek eta horrela izaten ari da.

Asteartean Irun eta Hendaia lotzen dituen Santiagoko zubian batu ziren LAB sindikatuaren deiari erantzunez alde bakoitzetik abiatu ziren bi zutabeak. Modu horretan, Euskal Herri osoan «pentsio sistema publiko baten alde» ematen ari den borroka irudikatu zuten. Gaur asteazkenean, haatik, trenbideetako langileak izan dira «pentsioen erreformaren kontrako borroka maratoi bat dela irudikatzeko» errepidera atera direnak.

250 korrikalari eta 50 txirrindulari

Trenbideetako langileak egiten ari diren grebari bultzada emateko "borroken maratoia" antolatu dute burdinbideetako langileek, sindikatu gehienen babesa jasoz. Eguerdian atera dira 50 lagun inguru Hendaiako tren geltokitik eta kostaldera abiatu dira, handik Baionarako bidean jarraitzeko.

Antolatzaileek jakinarazi dutenez, guztira 250 korrikalari eta 50 txirrindularik parte hartu dute 42 kilometroko itzulian. Bidean ekimenarekin bat egin duten elkarte, mugimendu, alderdi eta sindikatuetako ordezkariek lekukoa pasa diote elkarri, atxikimendua erakutsi eta «guztiok batera goazela» adierazteko, azaldu dute parte hartzaileek.

Trenbideetako langilea den Urruñako Ramuntxo, adibidez, LABeko afiliatua da, eta bide guztia lasterka egiteko prestatu da, izan ere, 53 egun greban daramatzaten arren, «motibatuak» direla azaldu du. Bere iritziz, «ez dugu beste aukerarik, mobilizatzera obligatuak gira eta ekimen honek jendearen arreta geureganatzeko balio dezake».

Arratsaldeko 17.45ak aldera iritsi da "borroken maratoia" Baionara eta jendeak bat egin du mobilizazioarekin. Seiak aldera, 200 martxista inguru iristi dira Baionako tren geltokiaren aitzinera. Eskuetan lastargiak zituzten beste 200 lagun inguru zituzten zain ongi etorria emateko. Jendea inguruko tarbenetatik atera eta gerturatzen hasi da eta trenbideetako langileak etxafuegoak botatzen hasi dira, txalo eta zarata artean.

Peio Dufau, trenbideetako grebalaria eta CGT sindikatuko ordezkariak hartu du hitza. Oraindik izerditan, «mundu guztiari eskerrak» eman dizkio. «Borroka gogorra da, baina ederra da, determinazioa dugu eta irabaziko dugu», oihukatu du Dufauk eskuko bozgorailu batekin. 

Lastargiak Baionan

Martxistek atseden hartu eta indarrak berreskuratzeko pausa bat egin dute, izan ere batzuek sei ordu egin dituzte korrika. Laranjak, ura eta jaki gozoak banatu dituzte antolatzaileek, eta jarraian, pasa den astean bezala, «lastargien martxa» abiatu dute Baionako erdigunera.

Besteen artean, LAB, CGT, Solidaires,FO sidnikatuetako kideak, txaleko horiak eta Bizi mugimenduko militanteak batu dira manifestazioan. 400 lagun inguruk Santespirituko zubia zeharkatu eta Baionako karriketan barrena ibili dira, «Macronen erreforma atzera bota arte ez dugu etsiko» aldarrikatzeko.