Hala adierazi dute ostiral honetan «Por la defensa del derecho a la vivienda. Etxebizitzarako eskubidearen alde» lelopean Iruñean hainbat plataformak antolatu duten elkarretaratzean. Horien artean, Pobreziaren eta Gizarte Bazterketaren aurkako Nafarroako Sarea, Hipotekek Kaltetutakoen Nafarroako Plataformak (PAH), Iruñea Harrera Hiria/Ciudad de Acogida, Nafarroako Gazteriaren Kontseilua, Papeles y Derechos Denontzat, CEAR eta SOS Arrazakeria Nafarroa.

«Etxebizitza hutsen erregistroa», «Alokairu sozial gehiago», «Etxebizitza duin gehiago», «Babes ofizialeko etxebizitzen kalifikazio mugagabea» eta «Etxebizitza izateko eskubidearen alde» zioten kartelei eusten zieten berrogeita hamar bat lagunek inguratuta egin dute agerraldia, Nafarroako Gobernuaren egoitzaren aurrean.

Beatriz Villaimanek eta Carlos Oizek agiri bat irakurri dute, eta bertan nabarmendu dute artatzen dituzten pertsonek etxebizitza behar dutela eta «eskubide hori eskuratzeko zailtasunak dituztela, jatorria, arrazalizazioa, generoa, adina, egoera administratiboa edo egoera sozioekonomikoa direla eta».

Arazoa konpontzeko «indarrak batzeko» deia egin dute, «Nafarroan dagoen eskariari erantzuteko etxebizitza parke publiko baten falta eta, oro har, etxebizitza arloan politika ausart baten» gabeziaren aurrean.

Antolatzaileen esanetan, covid-19ak eragindako osasun krisiak «aurreko egoera larriagotu besterik ez du egin», eta «sistemaren gabeziak» agerian utzi ditu, «egiturazko neurriak eta neurri espezifikoak» are beharrezkoagoak egiten baitituzte.

Nafarroan hartutako larrialdi neurriek eta pandemiak eragindako egoerak gaur egun «su-etena» bizitzea ahalbidetzen dutela azpimarratu dute eta horrek okerrera egingo duela ohartarazi dute. Hala, «larrialdi egoerak lehertzea eta etxebizitza eskuratzeko eta mantentzeko egiturazko zailtasunak gogortzea» aurreikusi dute.

Horren aurrean, hainbat proposamen

Hori guztia dela eta, gogorarazi dute kolektibo horiek adostasuna lortu dutela joan den otsailean planteatutako zenbait proposamenen inguruan: etxebizitza hutsen erregistro bat lehenbailehen egitea; alokairu-poltsa indartzea, hobetzea eta handitzea; alokairuaren prezioa arautzea; etxebizitza turistikoen ezarpena murriztea; eta alokairu sozial gisa bizileku-alternatibarik bermatzen ez duen edozein etxegabetze debekatzea.

Halaber, etxebizitzari buruzko araudia pertsonen errealitate sozioekonomikora eta juridikora egokitzeko eskatu diote Administrazioari; izan ere, horrek diskriminaziorik eza eta baliabide eta zerbitzuak eskuratzeko baldintza berdinak izatea bermatzen du; oztopo administratibo eta digitalak kentzea ere eskatu dute; eta, azkenik, Nafarroako udal guztietan etxebizitza hutsen gaineko zerga bat onartzea.

Ezarri nahi diren beste neurri batzuk dira genero, adin, arrazalizazio edo jatorria bezalako irizpide diskriminatzaileak aplikatzen dituzten agentzientzako zehapenak eta asiloa eskatzen duten errefuxiatuen eta egoera ahulean dagoen edozein pertsonaren lehen harrerarako etxebizitzen lagapena handitzea.