Bilbaobizi bizikletak maileguan hartzeko udal zerbitzuak 28 ainguraketa dituen bilketa eta emate gune berria estreinatu du ostiral honetan Artatzamina kalean, Matiko auzoan.

Mailegu gune berria martxan jarrita, Bilbaobizik 42 ditu hiri osoan, 1.235 ainguratze eta 700 bizikletarekin. Hurrengo hilabeteetan beste lau mailegu gune berri jarriko dira martxan.

2018ko urrian martxan jarri zenetik, Bilbaobizik hiru milioi erabilera baino gehiago izan ditu, eta 25.000 pertsonak baino gehiagok eman dute alta. 2019an, erabilera kopurua 4,5 aldiz biderkatu zen eta 377.154 izatetik 1.704.364 izatera igaro zen. Iaz, pandemiaren eragina handia izan eta zerbitzua 105 egunez itxita egon arren, 941.334 erabilera izan ziren.

2020ko martxoaren 14tik, pandemiaren ondorioz, zerbitzuak hainbat aldaketa izan ditu funtzionamendu baldintzetan, osasun publikoko arrazoiak direla eta, hala nola maskara nahitaez erabiltzea.

Egun, ordutegia honako hau da: astelehenetik ostiralera 06:00etatik 21:30era, eta larunbatetan 06:00etatik 14:30era. Bi kasuetan, bizikletak amaitu eta 30 minutura itzul daitezke. Igande eta jaiegunetan ez du funtzionatzen zerbitzuak eta etengabeko gehieneko denbora ordu erdikoa da.

Izan ere, pandemiaren hasieratik ezarritako murrizketa horiek erabiltzaileen kritika asko eragin dituzte. Aurreko funtzionamendura itzultzeko eskatu dute: bizikletak eguneko 24 orduetan aktibo egotea, igande eta jaiegunak barne.