Uztailaren 3an Bilboko Areatzan egingo den ‘Hamaika Gara’ dinamikaren sustatzaileek bertan Zetak, Olatz Salvador, Dupla eta Itziar Ituño izanen direla iragarri dute. Gure Eskuk igorritako ohar batean zehazten dutenez, horiek guztiek zuzeneko musika eskainiko dute Bilboko ibaian ibiliko den itsasontzi batetik.

Dupla eta Itziar Ituñoren arteko elkarlanaren emaitza da, hain justu, ‘Hamaika Gara’ abestia, eta urrian plazaratutako bideokliparen arrakastaren ondoren, estreinakoz abestuko dute jendaurrean. 

17:30etan, Bilboko ibaia eszenatoki bilakatuko da, eta jendea ibaiaren inguruan biltzea dute aurreikusia, Areatzako pasealekuan, Erripako kaian eta Areatzako eta Udaletxeko zubietan. Jendartea burujabetzaren aldeko aldarriak eramatera animatu dute: «Nork eraman dezala bere kartela, eta nahi izanez gero, eskura ditzala gure webguneko atal berezituan jarri ditugunak».

«Erabakitzeko eskubidearen aldeko aldarria lau haizetara zabaltzeko modu asko dago, ordea, eta era original eta alai batean ere egin nahi dugu: Itziar Ituñok eta Duplako Beñat eta Garik Instagramen botatako erronkari eutsiz, ‘Hamaika Gara’ abestiarekin dantzatuko dugu. Ziurta dezakegu koreografia ez dela zaila, eta edonork dantzatzeko modukoa dela. Gainera, aurrez ikusi eta prestatzeko modua badago webgunean ikusgai jarri dugun bideo tutorialaren bidez», gaineratu dute.

Era berean, mobilizazioan parte hartzeko asmoa duen jendeari «konpromiso txartela» eskuratzea proposatu diote. «Zenbat izango garen jakinda, osasun neurriak egokitu ahalko ditugu, eta mobilizazioaren gastuei modu kolektiboan aurre egin». 5 euroko prezioa du txartelak eta Hamaika Gararen dendan eskura daiteke.

«Krisitik burujabeago irtetea»

Zentzu horretan «erabakitzeko tresnen beharra» nabarmendu dute. «Krisia kudeatzeko eta krisi honetatik nola irtengo garen erabakitzeko. Begirada altxatzen hasteko unea da, unean-uneko urjentziek zerikusi handia baitute etorkizuneko erronkekin». Honela, osasun egoerak azaleratu dituen autogobernuaren gabeziak nabarmendu dituzte. «Autogobernua hau bada, onar dezagun, zintzotasunez, ez dela nahikoa. Pandemia honek gure gizartearen arrakalak are gehiago handitu ez ditzan eta denok etorkizun duinagoa eta bizigarriagoa izan dezagun, gure bizitzen jabe izan behar dugu, erabakimena behar dugu».

Horregatik «herritarron gehiengoak erabaki nahi duela ikustarazi, eta gehiengo hori burujabetzarako prozesuan inplikatzea» da Hamaika Gara ekimenaren helburua. «Indarrak batzen ari gara erreferendum bidez erabakitzea posible egiteko», azpimarratu dute, eta bide horretan hiru erronka jarri dizkiete herritarrei: erreferendumaren aldeko manifestua sinatu eta kanpainaren eskumuturrekoa janztea, inguruan sinadurak biltzea eta uztailak 3an Bilboko mobilizazioan parte hartzea.