Girora moralez gainezka joan zinen Alpeetako Tourra bukatu ondoren. Nola atera zen lasterketa?

Espero ez zen lekutik, karrera askotan pasatzen den moduan. Planifikazioan hilabeteak pasatzen ditugu lasterketa baterako prestatzen eta zuzendariak eta entrenatzaileak planifikatzen dute zer gerta daitekeen, baina azkenean ezustekoak gertatzen dira. Mikelen [Landa] erorketa larriak plan guztiak aldatu zizkigun, berriro moldatu behar izan genuen, baina esan beharra dago pasatako arazo guztiak gainditu ondoren sekulako emaitza lortu genuela bigarren bukatuz eta bi etapa irabazita.

Nik ezin dut nire emaitza pertsonalak bakarrik aztertuta baloratu lasterketa bat. Egongo dira lasterketak etapa bat irabazi edo etapa bat irabaztetik oso gertu ibili ondoren etxera ez naizela Girokoak bezalako sentsazio onekin bueltatu. Lan borobila egin genuen, Carusok gure babesa behar zuen eta une zail asko gainditu zituen taldearen laguntzarekin. Horren parte sentitzeagatik eta horrelako ziklista bat hor goian ikusteagatik pena merezi du taldearen parte izateak. Asko poztu ninduen horren parte sentitzeak.
​
​Erorketa bakoitzaren ondoren, altxatu egin zineten. Hori izan daiteke Giroko aipagarriena?

Bai, arazo horiek guztiak guretzako gogorrak izan ziren; erorketa nahiko gogorrak izan ziren, Matej [Mohoric]četa Mikelen kasuan ez ziren helmugara heldu, eta zaila da hurrengo egunean ezer gertatu ez balitz bezala ateratzea. Baina jakitun ginen lanean jarraitu behar genuela Milanera iritsi arte. Gidoia argi, egoerari buelta ematen jakin genuen. Bagenekien talde oso indartsua genuela eta indar hori aprobetxatu behar genuela.
​
​Zu pertsonalki agian ez zinen egon nahi zenuen mailan, baina ondo bukatu zenuen...

Bai, agian erregulartasun hori falta izan zitzaidan. Hori bai, etapa askotan ez da ikusten egindako lana; behin Carusorentzat lanean jarrita, etapa askotan laguntza eman nion edo beste egun batzuetarako gorde nituen indarrak. Azkenean badirudi lehenengo hamarretan ez bazara iristen txarto egon zarela edo ez zarela ondo sentitu, baina, sailkapen nagusitik deskonektatzerakoan, egun asko lasaiago hartu nituen behin egin beharreko lana egin ondoren. Egia da bigarren astean ez nintzela ondo aurkitzen, arazo muskular batzuk izan nituela, baina fisioekin eta osteopatekin lan asko egin genuen, mantentzeko eta hurrengo egunetarako errekuperatzeko. Horretan zorte ikaragarria daukagu; fisioterapeuta, Jon [Basterretxea], nire laguna da, herrian bertan bizi da, eta sekulako lana egin zuen.

Bigarren astean borrokan eta sentsazio arraroekin ibili nintzen, baina erantzun beharra sentitu nuen taldean gutxi geratzen ginelako eta mendiko etapetan agian ni nintzelako aurrean eutsi zezakeen bakarra. Hirugarren astean sentsazioak, berriro ere, hobeak izan ziren eta azkeneko etapa izan zen errematerik onena. Erakutsi genuen Damianok podiumari eutsi baino gehiago egin zezakeela jarrera ausarta erakutsiz.
​
​Nola iritsi zara Tourrera?

Dena ondo joan da. Aste bat lasai hartu nuen Giroaren ostean, tarteko astean karga gehiago sartu nuen eta, txapelketen astean gauza handirik ezin denez egin, daukaguna mantentzen saiatzen gara. Espero dut ondo egotea. Bi itzuli handi jarraian egitearen iazko esperientzia daukat eta horrek konfiantza ematen dit.
​
​Zure kasua besteekin alderatuz desberdina da agian: gero eta gehiago korritu, orduan eta hobeto sentitzen zara...

Azken urteetan hori izan da atera dudan ondorioa. Pasa den urtean segur aski inork espero ez zuen errendimendua eman nuen Giroan. Askotan zure burua probatzen ez baduzu ez dakizu noraino iritsi zaitezkeen eta nik behintzat abantaila hori daukat, badakidalako momentu horietan nola erantzuten dudan. Momentu askotan hori bilatzera joan naiteke, karrera egun asko pilatu nire maila fisiko hoberena lortzen saiatzeko.

Guretzako berezia izango da Tourra Pirinioetan erabakitzea eta espero dugu euskal zaleak bertan egotea. Luz Ardideneko etapa seguru berezia izango dela: espero dut aukera izatea etapa lehiatzeko

Taldea zein asmorekin heldu da Tourrera? Norbaitek sailkapen nagusia lehiatuko al du?
​
Helburu asko ditugu, baina nire ustez lehenengo astea pasa beharko dugu helburu konkretu batzuk finkatzeko. Printzipioz, Jack Haig da sailkapen nagusia lehiatzeko gizon bakarra, baina taldea ez da guztiz berarengan zentratuko, Tourrean sailkapen nagusia lehiatuko duen lehen aldia baita. Hala, beste denak etapen bila joango gara. Aukera polita daukagu lehen astean Colbrellirekin etaparen bat lortzeko eta maillot horiaren zein berdearen borrokan sartzeko.
​
​Haig ondo ibili da Dauphinen. Horrek morala emango dizue lider izaten ohituta ez dagoen txirrindulari batentzako lan egiteko?

Bai, nire ustez ez dugu presio handirik; etapa zehatz batzuetan agian babes pixka bat eman behar diogu, baina ezin gara gehiegi zoratu. Ezin diogu berari presio hori transmititu. Joango gara apurka-apurka ikusten noraino heltzeko aukera duen eta horren arabera norainoko laguntza behar duen. Etapen lehian ere sartuko gara, batez ere ikusita lehen astean denbora galerak egon daitezkeela.
​
​Aurtengo Tourra ez da iazkoa bezain gogorra. Erlojupekoek garrantzi handiagoa izan dezakete?

Aurten agian ez dago media montaña bezala ezagutzen den horretatik hainbeste, etapa berezituagoak daude, mendikoak eta lauak. Mendiko etapen artean aurten Pirinioak izango direla erabakigarriak esango nuke. Guretzako berezia izango da Tourra Pirinioetan erabakitzea eta espero dugu euskal zaleak bertan egotea. Luz Ardideneko etapa seguru berezia izango dela: hainbeste urte pasa ondoren hara bueltatuta, espero dut aukera izatea etapa lehiatzeko.
​
​Hori izan daiteke zuretzako etapa politena garaipena lortzeko?

Bai, seguru. Euskaldunontzako daukan esanahiagatik batez ere.
​
​Nola ikusten duzu Ineos taldearen eta esloveniarren arteko borroka?

Ineosek lider nagusirik ez du eta horrek estrategia aldaketa bat ekarriko du beraientzat, seguru. Nire ustez, aurten Tourra ikusgarriagoa izango da, Ineos bezalako talde batek erritmoa jartzean karrera lotuta doalako eta pasa den urtean Jumbok jarrera berdina izan zuelako. Agian, horregatik, Tour desberdin bat ikusteko aukera izango dugu. Seguru nago Ineosek gehiago arriskatuz jokatuko duela.
​
​Pogacar, Roglic eta Ineosekoez gain, norbait ikusten al duzu Tourra irabazteko edo podiumean sartzeko aukerekin?

Faborito horietatik hurrengoetara nire ustez distantzia handia dago mailan, beraz, ez dut uste sorpresa handirik egongo denik horien artean arazorik ez badago. Baina Tourra da eta edozer pasa daiteke, erorikoak, abanikoak edo dena delakoa. Baina dena normal joanda sorpresak nahiko zail ikusten ditut aurten.